Azərbaycan, Bakı, 15 sentyabr /Trend, müxbir N.İsmayılova/
Azərbaycan İqtisadi İnkişaf Nazirliyi yanında Sahibkarlara Kömək Milli Fondu Xəzər rayonu Pirallahı qəsəbəsi sakinlərinin məşğulluq sahələrinin şaxələndirilməsinə istiqamətlənib. Trend-in məlumatına görə, bu barədə cümə axşamı Fondun icraçı direktoru Şirzad Abdullayev jurnalistlərə deyib.
"Qəsəbə sakinləri əsasən neft-qaz sahəsində işləyir və bizim əsas vəzifəmiz digər sahələrdə iş yerlərinin təminidir", - Abdullayev bildirib.
Onun sözlərinə görə, Fond evdar qadınlar üçün də yeni iş yerlərinin təşkili istiqamətində tədbirlərin həyata keçirilməsini planlaşdırır.
"Bunlar arasında evdar qadınların sahibkarlıq fəaliyyətinə cəlb olunması məqsədilə tikiş müəssisələrinin və istehsal, emal və xidmət sahəsində digər müəssisələrin yaradılması var", - Abdullayev deyib.
Cümə axşamı Fond Pirallahı qəsəbəsinin 19 sahibkarına 2,36 milyon manatlıq kredit verib. Ümumilikdə Bakı qəsəbələrində kiçik və orta sahibkarlığa dəstək üçün 26,7 milyon manatlıq 116 kredit ayırıb ki, bu da 1120 iş yerinin açılmasına kömək edəcək.
2011-ci ildə Fond 98,8 milyon manatlıq 1199 kredit verib. Bu vəsaitlər 83 milyon manatlıq 62 iri layihənin və 14 milyon manatlıq 1122 kiçik layihənin həyata keçirilməsinə yönəldilib.
2011-2013-cü illərdə Bakı və ətraf qəsəbələrin sosial-iqtisadi inkişafı üzrə Dövlət Proqramı Prezident İlham Əliyev tərəfindən 2011-ci il mayın 4-də təsdiq olunub.
Sentyabrın 15-nə olan rəsmi məzənnə 0,7867 AZN/USD təşkil edir.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
