Azərbaycan, Bakı, 21 sentyabr /Trend, müxbir N.İsmayılova/
2011-ci ilin birinci yarısında Azərbaycanın xarici iqtisadi əlaqələrində qabaqcıl yerlərdən birini 3544,9 milyon dollar məbləğində qarşılıqlı xidmətlər balansı tutub. Trend-in məlumatına görə, bu barədə Azərbaycan Mərkəzi Bankının saytında yerləşdirilmiş ödəmə balansında deyilir.
Məlumata görə, bu məbləğdən 2367,8 milyon dollarlıq xidmətlər Azərbaycanın qeyri-rezidentləri tərəfindən rezidentlərə, 1177,1 milyon dollarlıq xidmətlər isə xarici ölkə rezidentlərinə göstərilib. Beləliklə, xidmət balansının saldosu mənfi olub və 1190,7 milyon dollar təşkil edib.
Qarşılıqlı xidmətlər balansında 20,9 faiz 739,5 milyon dollar məbləğindəki nəqliyyat xidmətlərinin payına düşüb. Bunlardan 52,5 faiz Azərbaycan rezidentlərinə xarici ölkələrin nəqliyyat sistemlərindən istifadə üçün göstərilmiş xidmətlərin payına düşüb. Azərbaycanın ölkənin qeyri-rezidentlərinə göstərdiyi nəqliyyat xidmətlərinin dəyəri 351,2 milyon dollar olub.
İlin birinci yarısında Azərbaycanda xaricilərə göstərilmiş turizm xidmətlərin dəyəri 516,8 milyon dollar olub. Bu xidmətlərin 31,3 faizi Azərbaycana iş səfərləri üçün gəlmiş qeyri-rezidentlərə göstərilib.
Öz növbəsində, xarici ölkələr tərəfindən Azərbaycan rezidentlərinə göstərilmiş turizm xidmətlərinin dəyəri, ötən ilin müvafiq dövrü ilə müqayisədə 2,1 dəfə - 709,2 milyon dollaradək artıb. Bunlardan 64,3 faiz şəxsi xarakterli xidmətlərin payına düşür.
Nəticədə, ilin birinci yarısında Azərbaycanın xarici ölkələrlə ixrac-idxal münasibətlərinin ümumi həcmində qarşılıqlı xidmətlərin xüsusi çəkisi 13,4 faiz təşkil edib.