Azərbaycan, Bakı, 30 sentyabr /Trend, müxbir A.Axundov/
2012-ci ildə Azərbaycan Respublikası Dövlət Neft Fondundan (ARDNF) ölkə büdcəsinə transfertlərin həcmi cari ilin göstəricilərindən çox da fərqlənməyəcək. Bu barədə cümə günü Trend-ə maliyyə nazirinin müavini Azər Bayramov deyib.
"2012-ci ildə ARDNF-dən transfertlər təxminən 2011-ci ildəki səviyyədə (9,2 milyard manat səviyyəsində təsdiq olunub) olacaq", - Bayramov bildirib.
Onun sözlərinə görə, ümumilikdə gələn il büdcə həcminin 2011-ci illə müqayisədə əhəmiyyətli dərəcədə artımı nəzərdə tutulmur.
Azərbaycanın 2012-ci il büdcəsinin gəlir hissəsi 16 436,4 milyon manat, xərclər hissəsi 16 984,4 milyon manat kimi proqnozlaşdırılıb. 2011-ci ilin proqnozları ilə müqayisədə büdcə gəlirlərinin artımı 5,67 faiz, xərclər isə 6,5 faiz səviyyəsində gözlənilir.
Nazir müavininin sözlərinə görə, 2012-ci il üçün neft gəlirlərinin proqnozu 2011-ci ilin faktiki gəlirlərindən aşağı olacaq.
"Faktiki gəlirlər 80 dollardan artıq olan cari qiymətlərə görə hesablanır, proqnozlar isə 80 dollar qiyməti ilə (bu rəqəm büdcənin təşkili üçün müəyyənləşdirilib). Ona görə də təbiidir ki, 2012-ci il üçün neft gəlirləri üzrə proqnoz 2011-ci ilin faktiki gəlirlərindən aşağı olacaq", - o deyib.
2001-2011-ci illərdə ARDNF-yə 60 milyard dollar daxil olub, bunun bir hissəsi yığıma göndərilib.
2011-ci il yanvarın 1-nə ARDNF-nin aktivləri 22,8 milyard dollar təşkil edib. Fondun cari aktivləri 32 milyard dollardır.
Bu il Fondun gəlirlərinin 12 796,2 milyon manat səviyyəsində olacağı gözlənilir.
ARDNF-nin Nizamnaməsinə görə, Fondun vəsaitləri strateji baxımdan mühüm infrastruktur obyektlərin tikintisi və yenidən qurulmasına, eləcə də vacib ümummilli problemlərin həlli üçün istifadə oluna bilər. 2001-2009-cu illərdə əsas diqqət həm neft sektorunun, həm infrastruktur sahələrin, həm də ölkənin qeyri-neft sektorunun inkişafına yönəldilib. Hazırda irriqasiya, nəqliyyat sahəsində bir sıra mühüm layihələr maliyyələşdirilir.
Dövlət Neft Fondunun əsas məqsədləri bunlardır: iqtisadiyyata mənfi təsirlərin minimallaşdırılması məqsədilə Fondun vəsait və aktivlərini xaricdə yerləşdirməklə müəyyən dərəcədə "holland sindromu"nun qarşısını almaq, vəsaitlərin gələcək nəsillər üçün toplanmasını təmin etmək və ölkədə cari sosial-iqtisadi prosesləri dəstəkləmək.
Sentyabrın 30-na olan rəsmi məzənnə 0,7869 AZN/USD təşkil edir.
