Azərbaycan, Bakı, 11 oktyabr /Trend, müxbir A.Axundov/
Azərbaycan Mikromaliyyə Asosiasiyasının "Oxfam" beynəlxalq təşkilatı ilə birgə "Kənd təsərrüfatı kreditlərinin sığorta mexanizmi" layihəsi çərçivəsində təkliflər 2012-ci ilin yanvarında Nazirlər Kabinetinə göndəriləcək. Bu barədə bazar ertəsi Trend-ə layihənin əlaqələndiricisi Ayxan Nəsibli bildirib.
"Hazırda kənd təsərrüfatı sığortası ilə bağlı mövcud qanunvericiliyə əlavə və dəyişikliklərin edilməsi üçün hüquqi bazanın hazırlanmasını əks etdirən layihənin ikinci mərhələsi davam edir" - Nəsibli qeyd edib.
Onun sözlərinə görə, ikinci mərhələni dekabrın axırı - yanvarın əvvəlinə qədər başa çatdırmaq planlaşdırılır.
"Biz ikinci mərhələ çərçivəsində hüquqi bazanın hazırlanmasına yardım edəcək yerli "İqtisadi Araşdırmalar Mərkəzi" QHT ilə müqavilə bağlamışıq", - Nəsibli bildirib.
Onun sözlərinə görə, oktyabrın ikinci yarısında layihəni işləyənlərin Türkiyənin Kənd təsərrüfatı kreditlərinin sığortalanması fondu - TARSİM-in fəaliyyəti ilə yerində tanış olmaq məqsədilə İstanbula səfəri gözlənilir.
Fevral ayında layihənin Azərbaycanda araşdırmalar aparmaq, vəziyyəti və beynəlxalq təcrübəni öyrənmək, tövsiyələri hazırlamaqdan ibarət birinci mərhələsi sona çatıb,
Layihə çərçivəsində əsas təkliflərdən biri kənd təsərrüfatı kreditlərinin sığortalanması sahəsində zəmanət fondunun yaradılmasından ibarətdir.
Nəsiblinin sözlərinə görə, sonuncu - üçüncü mərhələ layihənin yüksək dövlət səviyyəsində qəbulunu nəzərdə tutur.
"Kənd təsərrüfatı sığortasının mexanizminə dair yeni dəyişikliklərin ayrıca qanun kimi qəbul olunacağı hələ məlum deyil, amma çox güman ki, bu əlavə və dəyişikliklər artıq mövcüd qanunvericiliyin bu mexanizmə aid maddəsinə daxil ediləcək", - Nəsibli deyib.