Azərbaycan, Bakı, 28 noyabr /Trend, müxbir A.Axundov/
Aşkar edilən yataqların hamısı nəzərə alınmaqla Azərbaycanın qızıl ehtiyatları 1500-2000 ton təşkil edir. Bu barədə bazar ertəsi Trend-ə ekologiya və təbii sərvətlər naziri Hüseynqulu Bağırov deyib.
"Bütün yataqların işlənməsinə nə qədər investisiyanın tələb olunduğunu söyləmək çətindir. Bizim böyük sahələrdə işlər aparmaq üçün lazım olan qızıl mədən yataqlarımız var. Bəzi yataqlarda isə əksinə, böyük həcmdə qızıl var, digər yerlərdə isə yollar yoxdur, infrastruktur lazımdır. Hər bir yataq fərdi yanaşma tələb edir, lakin hazırda qızılın qiyməti bütün yataqlarda iş aparmağa imkan verir. İşlərin aparılması hətta ən zəif yataqda belə, mənfəətlidir", - Bağırov bildirib.
Bağırov əvvəllər deyib ki, Azərbaycan 2009-cu ildən bəri 3 min tondan çox qızıl istehsal edib.
"Azərbaycan artıq dünyada qızıl istehsal edən ölkələr sırasına daxil olub. Ölkədə 2009-cu ildən 3 min tondan çox qızıl istehsal edilib", - nazir deyib.
Onun sözlərinə görə, "Gədəbəy" qızıl-mis yatağının ehtiyatlarının qiymətləndirilməsi aparılıb.
"Əgər əvvəllər onun ehtiyatları 4,79 min ton mis, 6,061 ton qızıl və 71,96 ton gümüş səviyyəsində qiymətləndirilirdisə, indi isə 37 min ton mis, 23 ton qızıl, 190 ton gümüş səviyyəsində hesablanır", - Bağırov vurğulayıb.
Nazirin sözlərinə görə, hazırda həmin yataq "RV Investment" şirkəti tərəfindən istismar edilir.
Onun sözlərinə görə, Daşkəsən mədən rayonundakı "Çovdar" qızıl yatağının sənaye ehtiyatları 44,61 ton qızıl və 164,25 ton gümüş səviyyəsində qiymətləndirilir.
"Hazırda "Londex" şirkəti bu yataqda kəşfiyyat işləri aparır", - Bağırov deyib.
"Londex Resources S.A." geoloji şirkəti Azərbaycanda dağ mədən layihələrinin həyata keçirilməsi üçün yaradılan investisiya şirkətlər qrupu konsorsiumuna başçılıq edir.
İlkin proqnozlara əsasən, həmçinin, Goranboy və Göygöl inzibati rayonlarının cənubundakı 400 kvadratmetrlik sahədə 360 ton qızıl, 1120 ton gümüşün mövcudluğu proqnozlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. Ümumilikdə, 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.
Azərbaycanda qızıl istehsalçısı "Anglo Asian Mining Plc" şirkəti 2011-ci ilin üçüncü rübündə "Gədəbəy" qızıl-mis mədənindən hasil edilən 13 166 unsiya qızıl istehsal edib ki, bu da cari ilin ikinci rübün sonuna olan göstəricidən 9,7 faiz azdır. 2011-ci ilin başlanğıcından istehsalın ümumi həcmi 41 770 unsiyaya çatdırılıb.
"Biz əvvəlki kimi əminik ki, 2011-ci il ərzində 58-60 min unsiya qızılın istehsalı üzrə məqsədimizə çatacağıq. Bu nəzərə alınmaqla, gələcəkdə istehsalın artımını və layihənin uğurunu təmin edən səmərəliliyin artırılması üzrə təşəbbüslərin hazırlanması və həyata keçirilməsində yüksək fəallıq göstərməyə davam edirik", - şirkətin icraçı direktoru Rza Vəziri əvvəllər deyib.
"Anglo Asian Mining Plc" şirkəti 1997-ci ilin avqustunda Azərbaycan hökuməti ilə imzalanmış müqaviləyə əsasən, Azərbaycanın cənub-qərbindəki altı yataqda - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü"də işləmək hüququna malikdir.
Azərbaycan hökuməti ilə Azərbaycan Beynəlxalq Mədən Əməliyyatı Şirkəti arasında 30 il müddətinə imzalanan hasilatın pay bölgüsü haqqında müqavilədə Azərbaycanın pay hissəsi 51 faiz, Böyük Britaniyanın "Anglo-Asian Mining plc" şirkətinin pay hissəsi isə 49 faizdir.
Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.