Azərbaycan, Bakı, 9 dekabr /Trend, müxbir N.İsmayılova/
Asiya İnkişaf Bankı (AİB) Azərbaycan yol layihələri (Road Network Development Program) üçün multitranş paket (Multitranche Financing Facility - MFF) çərçivəsində kreditlərdən istifadə müddətinin daha üç il uzadılması ilə bağlı Azərbaycan hökumətinin sorğusunu bəyənib. Bu barədə cümə günü Trend-ə AİB-in ölkədəki nümayəndəliyinin rəhbəri Olli Noroyono bildirib.
Azərbaycanla AİB arasında yol layihələrinin multitranş maliyyələşdirilməsi üzrə çərçivə krediti haqqında saziş 2007-ci il avqustun 8-də imzalanıb.
"Proqram çərçivəsində tranşların Azərbaycana verilməsinib yubanması və kredit resurslarının bir hissəsindən istifadə olunmaması ilə əlaqədar tərəfimizdən hökumətin kreditlərdən istifadə müddətinin uzadılması haqqında sorğuya baxılıb və bəyənilib", - Noroyono deyib.
Onun sözlərinə görə, bu proqram çərçivəsində istənilən tranşın ödənişinin aparıla biləcəyi sonuncu tarix əvvəl müəyyən edilmiş 2014-cü ilin dekabrı əvəzinə indi 2017-ci ilin dekabrına təyin edilib. Gözlənildiyi kimi, multitranş maliyyələşdirmədən sonuncu tranş 2010-cu ilin dekabrı əvəzinə 2013-cu ilin dekabrından gec olmayaraq təqdim olunacaq.
AİB 2007-ci ilin avqustunda imzalanmış 500 milyon dollar multitranş paketdən avtomobil yollarının tikintisinə artıq 255,4 milyon dollar ayrılıb.
AİB 1966-cı ildə üzv dövlətlər tərəfindən Asiya İnkişaf Bankının yaradılması haqqında sazişə uyğun olaraq təsis edilib. 2010-cu il dekabrın 31-nə olan məlumata görə, AİB-in 67 üzvü var.
