...

Azərbaycanda potensial müştərilərin yarıdan çoxu istehsalatda icbari sığorta ilə əhatə olunub

Biznes və iqtisadiyyat xəbərləri Materials 19 Yanvar 2012 15:21 (UTC +04:00)

Trend-i buradan izləyin

Azərbaycan, Bakı, 19 yanvar /Trend, müxbir A.Axundov/

2010-cu ilin dekabrında Azərbaycanda tətbiqinə başlanılan peşə xəstəlikləri və istehsalatda bədbəxt hadisələr nəticəsində peşə əmək qabiliyyətinin itirilməsi hallarından icbari sığorta üzrə artıq bütün potensial müştərilərin yarıdan çoxu sığortalanıb.

Bu barədə cümə axşamı Trend-ə Azərbaycanda həyat sığortası üzrə işləyən üç şirkətdən biri olan "Paşa Həyat"ın idarə heyətinin sədr müavini Niyaz İsmayılov deyib.

"Paşa Həyat"dan başqa, Azərbaycanda həyat sığortası üzrə "Atəşgah Həyat" və "Qala Həyat" şirkətləri də məşğul olurlar.

Onun sözlərinə görə, Azərbaycanda bu növ üzrə üç sığortaçının müştəriləri ola biləcək təxminən 150 min şirkət var, onlardan 60 faizə qədəri artıq sığortalanıb.

"Bu ilin sonuna qədər onlar da əhatə oluna bilər. Bu, şirkətlərin özlərindən asılıdır. Bundan başqa, yeni şirkətlərin, yeni sahələrin açılması davam edir, buna görə də həmin proses dayanmayacaq. Qalan yarısının sığortalanması davam edir, yeni müştərilər cəlb edilir, müqavilələr bağlanır", - İsmayılov qeyd edib.

Onun sözlərinə görə, bugünkü şərtlər nəzərə alınmaqla icbari həyat sığortası bazarında təxminən 10 milyon manatlıq əlavə sığorta mükafatları mövcuddur.

Həyat sığortası üzrə Azərbaycan şirkətləri ilk iş ilində bu növ üzrə 18,9 milyon manat toplayıblar ki, bu da life-sığorta sahəsində yığımların 83,81 faizini təşkil edir. Azərbaycanın bütün həyat sığortası bazarı 2010-cu ildəki 1,46 milyon manatdan 15,45 dəfə artaraq 22,55 milyon manata çatıb.

"Bu növ üzrə yığımların çox hissəsini (7,8 milyon manat) bizim şirkətimiz toplayıb. İkinci, "Atəşgah Həyat", üçüncü isə "Qala Həyat"dır. Bu növ üzrə şirkətimiz tərəfindən təxminən 200 min insan sığortalanıb. Onlar təxminən 1000 şirkətdə işləyirlər", - İsmayılov qeyd edib.

Onun sözlərinə görə, bu qanun üzərində nəzarət mexanizmi səmərəli işləyir və bu gün onun gücləndirilməsinə ehtiyac yoxdur.

İnzibati Xətalar Məcəlləsinə uyğun olaraq (253.1-ci maddə), istehsalatda icbari sığorta üzrə müqavilə bağlamayan müəssisə 150-200 manata qədər cərimələnə bilər.

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin göstərişlərinin yerinə yetirilməyəcəyi təqdirdə həmin məcəlləyə (318.1 maddə) uyğun olaraq, müəssisənin vəzifəli şəxsləri 1000 manatdan 2000 manata qədər cərimənin ödənilməsinə cəlb edilə bilər.

Qanuna əsasən, təşkilati-hüquq formalarından asılı olmayaraq, bütün müəssisələr, idarə və təşkilatlar, eləcə də hüquqi şəxs yaratmadan sahibkarlıq fəaliyyəti ilə məşğul olan fiziki şəxslər əmək müqaviləsi və ya mülki-hüquq müqaviləsi əsasında işin yerinə yetirilməsi, eləcə də fərdi qaydada sahibkarlıq və əmək fəaliyyəti üçün cəlb edilən işçilərini peşə xəstəlikləri və bədbəxt hadisələrdən sığortalamalıdırlar.

Dövlət Sığorta Nəzarəti Xidməti hazırda həyat sığortası üzrə şirkətlərin yaradılması üçün bir neçə təklifi nəzərdən keçirir.

Ümumilikdə, Azərbaycanda 29 sığorta və 1 təkrar sığorta şirkəti fəaliyyət göstərir. Bununla yanaşı, "Fidan Sığorta"nın sığorta fəaliyyəti göstərməsi üçün lisenziyası dayandırılıb.

Yanvarın 19-na olan rəsmi məzənnə 0,7862 AZN/USD təşkil edir.

Xəbər lenti

Xəbər lenti