Azərbaycan, Bakı, 24 yanvar /Trend, müxbir A.Axundov/
Azərbaycan hökuməti 1992-ci il yanvarın 1-nə qədər Azərbaycan SSR-in Əmanət Bankında əmanətləri olmuş vəfat edən şəxslərin varislərinə təzminat verməyə hazırdır. Bu, Milli Məclisin İqtisadi siyasət komitəsinin hazırladığı sovet əmanətlərinin qaytarılması haqqında qanun layihəsində nəzərdə tutulub.
"Vəfat edən əmanətçilərin varisləri müvafiq sənədləri təqdim etməklə əmanətləri ala bilərlər", - Milli Məclisin deputatı, parlamentin İqtisadi siyasət komitəsinin üzvü Əli Məsimli çərşənbə axşamı Trend-ə deyib.
Onun sözlərinə görə, bunun üçün əmanətçinin əmanət kitabçası, alan şəxsin şəxsiyyət vəsiqəsi, həmçinin alanın varisliyini təsdiq edən və Mülki Məcəllənin təyin etdiyi qaydada notariusun verdiyi sənəd təqdim edilməlidir.
"Əgər bir neçə varis varsa, təzminat alan zaman onlardan birinə buna digər varislərin razılığını təsdiq edən sənəd lazımdır və ya onlar birlikdə təzminat almalıdırlar. Varis haqqında sənəd mütləq notarius tərəfindən təsdiq edilməlidir. Əgər varislik məsələsinin ölkənin qanunvericiliyinə uyğun həll edilmiş vəsiyyətnaməsi mövcuddursa, bu sənəd qəbul ediləcək" , - Məsimli qeyd edib.
Onun sözlərinə görə, əmanətlərin qaytarılması qanunvericiliyə uğun olaraq altı il ərzində üç mərhələdə nəzərdə tutulur.
Birinci mərhələnin birinci ilində əmanətlərin əhalinin aztəminatlı təbəqəsinin nümayəndələrinə, 1935-ci ilə qədər anadan olan şəxslərə, şəhid ailələrinə, müharibə əlillərinə, birinci qrup əlillərə qaytarılması nəzərdə tutulur. Birinci mərhələnin ikinci ilində isə Qarabağ müharibəsi iştirakçılarına, 1940-cı ilə qədər anadan olan əmanətçilərə təzminat ödənilməsi planlaşdırılır.
İkinci mərhələnin birinci ilində 1945-ci ilə qədər anadan olanlara, ikinci ilində isə 1950-ci ilə qədər anadan olanlara və əvvəlki illər də daxil olmaqla onların varislərinə əmanətlərin qaytarılması nəzərdə tutulur.
Üçüncü mərhələdə 1950-ci ildən sonra anadan olanların və onların varislərinin vəsaitləri qaytarılmalıdır.
"Sonuncu kateqoriya kiçikdir, ona görə də onların qaytarılması bir ildən az vaxt tələb edəcək", - Məsimli deyib.
Onun sözlərinə görə, prosesin altıncı ili ərzində xüsusi komissiyanın qərarı əsasında əmanətlərin əmanət kitabçası itmiş, əmanət kitabçası almamış və digər səbəblər üzündən qanunvericilikdə müəyyən olunmuş təzminatı ala bilməyən əmanətçilərə qaytarılması nəzərdə tutulur.
"Bu, vaxt tələb edir, çünki belə problemə hər on əmanətçidən ikisi malik ola bilər. Onlar haqqında məlumat qanunun qüvvəyə mindiyi dövrün əvvəllərində toplanacaq, ödənişlər isə prosesin lap sonunda həyata keçiriləcək", - Məsimli deyib.
Yanvarın 24-nə olan rəsmi məzənnə 0,7862 AZN/USD təşkil edir.