Azərbaycan, Bakı, 26 yanvar /Trend, müxbir A.Axundov/
Azərbaycanın Kənd Təsərrüfatı Nazirliyi çayçılıq və pambıqçılığın inkişafı üzrə dövlət proqramı layihələrini hazırlayıb. Bu barədə cümə axşamı Trend-ə Azərbaycanın Kənd Təsərrüfatı Nazirliyinin Bitkiçilik məhsullarının istehsalı və emalı üzərində nəzarət şöbəsinin rəisi Sabir Vəliyev bildirib.
"Çayçılıq və pambıqçılığın inkişafı üzrə proqramlar artıq hazırlanıb və ötən il hökumətə təqdim edilib. Biz hökumətdən cavab gözləyirik", - Vəliyev qeyd edib.
Onun sözlərinə görə, proqramlar 2012-2022-ci illəri əhatə edir.
"Çayçılığın inkişafı üzrə proqramlar çərçivəsində bu sahənin inkişafı üçün lazım olan infrastrukturun yaradılması, ölkənin cənub rayonlarında zavodların tikintisi, çay istehsalçılarının dəstəklənməsi üzrə tədbirlərin keçirilməsi və s. planlaşdırılır", - Vəliyev bildirib.
2011-ci ilin sonunda Azərbaycanda üzümçülüyün inkişafı üzrə dövlət proqramı qəbul edilib.
"Gələcəkdə ehtiyac yaranarsa, kənd təsərrüfatının digər sahələrinin inkişafı üzrə dövlət proqramları hazırlana və qəbul edilə bilər, lakin bu, 2012-ci ildə gözlənilmir", - Vəliyev deyib.
