Azərbaycan, Bakı, 31 yanvar /Trend, müxbir İ.Xəlilova/
KfW Almaniya İnkişaf Bankı Azərbaycan hökumətinə Gəncə və Şəki şəhərlərində su təchizatı və kanalizasiya sistemlərinin bərpası layihəsinin maliyyələşdirilməsini artırmağı təklif edib. Bu barədə çərşənbə axşamı Trend-ə KfW-nin Bakı ofisindən məlumat veriblər.
"Bank bu iki şəhərdə su təchizatı və kanalizasiya sistemlərinin tam bərpası məqsədilə keçirilən qiymətləndirmənin əsasında layihənin maliyyələşdirilmə həcmini xeyli artırmağı təklif edib", - KfW-nin Bakı ofisindən bildiriblər. Bununla belə, mənbə maliyyələşdirmənin həcmini açıqlamaqdan imtina edib.
Almaniya bankı ilkin olaraq (qiymətləndirməyə qədər) bu iki şəhərdə tədbirlərin davam etdirilməsi üçün daha 83 milyon avro verməyə hazır olduğunu ifadə edib. Bunun 23 milyonu 2009-cu ildə, 40 milyonu 2010-cu ildə, 20 milyonu isə 2011-ci ildə Almaniya hökuməti tərəfindən bəyənilib.
"Qiymətləndirmənin nəticələri Azərbaycan hökumətinə təqdim edilib və hökumətin qərarından asılı olaraq maliyyələşdirmənin həcmi artırıla bilər", - KfW-dən deyiblər.
Layihənin birinci fazasının büdcəsi 55 milyon avro təşkil edir. 2006-cı ilin oktyabrında Berndə imzalanan sazişlərə uyğun olaraq, KfW layihənin reallaşdırılması üçün 37 milyon avro, İsveçrənin İqtisadi Məsələlər üzrə Dövlət Katibliyi (SECO) qrant formasında 10 milyon avro ayırıb. Layihədə Azərbaycan hökumətinin payı 8 milyon avro təşkil edir.
Layihənin birinci fazası Şəkinin 100 faiz, Gəncənin 50 faiz su ilə təmin edilməsini nəzərdə tutur. Gəncənin su təchizatı sisteminin gələcək inkişafı ikinci fazada həyata keçiriləcək.
KfW-nin Bakı ofisinin rəhbəri Natiq Abdulayevin əvvəl Trend-ə dediyinə görə, ikinci faza çərçivəsində işlərin maliyyələşdirilməsi üçün bank 23 milyon avro ayıracaq ki, bu da layihənin qiymətləndirilməsindən sonra gözlənilir.
"Almaniya bankının əsas məqsədi istehlakçıların su şəbəkəsinə 100 faiz qoşulmasıdır. Lakin Şəkidə tikinti işlərinə başlamaq üçün podratçının müəyyənləşdirilməsinin yubanması səbəbindən layihənin başa çatması 2014-cü ilədək uzanacaq", - Abdullayev qeyd edib.
Onun sözlərinə görə, Gəncədə artıq tikinti işlərinə başlanılıb. İşlər Türkiyənin "Hasalsan" şirkəti tərəfindən aparılır. Şəki üçün podratçının müəyyənləşdirilməsinə görə tender elan edilməsi planlaşdırılır.
SECO-nun vəsaiti hesabına Şəkinin infrastrukturunun qismən bərpası və konsaltinq xidmətlərinin təmin edilməsi, eləcə də avadanlıqların alınması nəzərdə tutulur.
