Azərbaycanın məzənnə siyasəti xarici riskləri azaldır - ekspert

Azərbaycan, Bakı, 6 fevral /Trend, müxbir A.Axundov/

Azərbaycan Mərkəzi Bankının (AMB) apardığı düzgün məzənnə siyasəti dünya iqtisadi böhranının ikinci dalğasının ölkə iqtisadiyyatına, xüsusən də bank sektoruna təsir etmək təhlükəsini xeyli azaldır. Bu barədə bazar ertəsi Trend-ə "AzərTürkBank"ın idarə heyətinin sədri Mehmet Sami Acarözmen bildirib.

"Təbii ki, qlobal böhran Azərbaycana da təsir edəcək, lakin bu təsir digər ölkələrə nisbətən az dərəcədə olacaq. Bunun əsas səbəblərindən biri səbəbsiz və əsassız formalaşdırılmayan milli valyutanın dəyəridir", - Acarözmen qeyd edib.

Onun sözlərinə görə, ölkə iqtisadiyyatında sabit vəziyyət müsbət amillərdəndir.

"Ölkə iqtisadiyyatının qızğın surətdə inkişaf etdiyi böhrana qədərki 2005-2008-ci illərlə müqayisədə bu gün bazardakı vəziyyət, ölkədə istehlak qiymətləri, bank faizləri tədricən sabitləşir, normallaşır və dünya göstəriciləri ilə uyğunlaşır. Həmin illərdə banklar pulları yüksək faizlə satırdılar və insanlar onları alırdılar.

Məsələn, bizim bankımız həmin vaxt 18-22 faizlə kredit təklif edirdi, bu gün isə 12-13 faizlə kredit verə bilər, yəni bank faizləri normallaşır. Həmçinin, yüksək olan əmlak qiymətləri normallaşır", - Acarözmen bildirib.

Onun sözlərinə görə, 2012-ci ildə bank sektorunun canlanması gözlənilir.

"2010 və 2011-ci illər Azərbaycanın bank sektoru üçün ağır keçdi. 2011-ci ildə 12 bank zərərlə işləyirdi. 2009-cu ilin sonuna bankların ümumi gəliri 252 milyon manat səviyyəsində olub, lakin il ərzində 120 milyon manatadək azalıb. Mən cari ilin sonuna bu göstəricinin ötənilki səviyyədə qalacağını gözləyirəm", - Acarözmen vurğulayıb.

Azərbaycanda 44 bank fəaliyyət göstərir.