Azərbaycan, Bakı, 18 fevral /Trend müxbir A.Axundov/
Cari ilin yanvar ayında Bakının təkrar mənzil bazarında 1 kavdratmetr mənzilin orta hesabla qiyməti 1430 dollar təşkil edib. Ötən ilin dekabrında bu göstərici 1380 dollar olub. Bu barədə şənbə günü Trend-ə "MBA Group" konsaltinq şirkətinin baş direktoru Nüsrət İbrahimov bildirib.
"Bu, birbaşa bazarda tələbatın sabitləşməsi ilə əlaqədardır", - İbrahimov qeyd edib.
Onun sözlərinə görə, bahalı mənzillərin orta hesabla qiyməti ötən ilin analoji dövrü ilə müqayisədə artıb ki, bu da təkliflər portfelində bahalı evlərin payının artması ilə əlaqədardır.
"68-75 min dəyərində olan mənzillər bazarda ən böyük paya (29 faiz) sahibdir. Mənzillərin orta hesabla otaq göstəricisi 2,41-ə bərabərdir. Hər bir otağın orta hesabla qiyməti 48160 dollar, mənzilin orta hesabla qiyməti 116066 dollar, mənzilin nominal qiyməti 106392 dollardır" , - İbrahimov qeyd edib.
Onun sözlərinə görə, qiymətlər əsasən, "Kiyev", "Minsk", "Leninqrad" və "Fransa" layihəli mənzillər üzrə artıb.
"Bu, böüyk ölçüdə onunla bağlıdır ki, həmin mənzillər ipotekanın predmetidir. "Arxitektura" mənzilləri, "axundovkalar" və "italyankalar" üzrə qiymətlər aşağı düşüb", - İbrahimov vurğulayıb.
