Azərbaycan, Bakı, 13 mart /Trend, müxbir A.Axundov/
Asiya İnkişaf Bankı (AİB) Azərbaycanla əməkdaşlığa başladığı dövrdən 2012-ci il yanvarın 1-dək ölkədə ümumi dəyəri 596,9 milyon dollar olan 7 layihə üzrə 10 kredit sazişi imzalayıb.
Trend-in məlumatına görə, bu barədə "Nazirlər Kabinetinin 2011-ci ildə fəaliyyəti haqqında hesabat"da deyilir.
3 layihənin icrası artıq başa çatıb, 4 layihənin reallaşdırılması davam edir.
2012-ci il yanvarın 1-dək ayrılan kreditlərin ümumi həcmindən 253,5 milyon dollar və ya 42,5 faizi xərclənib. 2011-ci ildə AİB-in kreditlərinin 108,6 milyon dolları istifadə edilib.
Azərbaycan borcların ödənilməsinə başa çatmış layihələr ("Selə qarşı tədbirlər", "Şərq-Qərb yolunun yenidən qurulması" və "Kiçik şəhərlərdə su və kanalizasiya sistemlərinin yenidən qurulması") üzrə kredit sazişləri çərçivəsində başlayıb.
2012-ci il yanvarın 1-nə olan məlumata görə, AİB-in Azərbaycan üçün təsdiq edilmiş kreditlərinin ümumi məbləği 1,094 milyard dollar təşkil edib.
