Azərbaycan, Bakı, 15 mart /Trend, müxbir A.Axundov/
Asiya İnkişaf Bankı (AİB) ay ərzində Azərbaycanda yol layihələri üçün multitranş paketinin (Multitranche Financing Facility - MFF) üçüncü tranşı çərçivəsində kredit sazişinin imzalanmasını gözləyir. Trend-in məlumatına görə, bu barədə cümə axşamı jurnalistlərə AİB-in Azərbaycandakı nümayəndəsi Olli Noroyono bildirib.
Onun sözlərinə görə, ölkə hökuməti imzalanma ilə bağlı daxili prosedurları başa çatdırır.
"Bizim gözləntilərimizə əsasən, imzalanma ay ərzində baş tutacaq, lakin hər şey hökumətin daxili prosedurlarından asılıdır", - Noroyono deyib.
200 milyon dollar həcmindəki üçüncü tranş ötən il təsdiqlənib. Bu vəsaitlər Masallı-Asatara dördzolaqlı sürət magistralının tikintisinin davam etdirilməsinə ayrılacaq.
44 milyon dollar həcmində dördüncü tranşın təsdiqlənməsi məsələsinə 2012-ci ildə menecmentlər tərəfindən baxılacaq. Bu kredit vəsaitinin maliyyələşdirmə üçün ayrılacağı yol sahəsi hələlik müəyyənləşdirilməyib.