Azərbaycan, Bakı, 16 aprel / Trend, müxbir E.İsmayılov/
Azərbaycan, Gürcüstan və Türkiyənin dəmiryol sisteminin birləşdirilməsini nəzərdə tutan Bakı-Tbilisi-Qars dəmir yolu 2013-cü ildə tam istismara veriləcək. Bu barədə bazar ertəsi Trend-ə Azərbaycanın nəqliyyat nazirinin müavini Musa Pənahov məlumat verib.
"Bu layihə çərçivəsində işlər ilin sonunadək Azərbaycan, Gürcüstan və Türkiyənin dəmiryol sisteminin birləşdirilməsi üçün gücləndirilmiş templərlə aparılacaq", - nazir müavini deyib.
Pənahovun sözlərinə görə, işlərin əsas həcmi Türkiyə ilə Gürcüstan arasındakı birləşdirici tunelin payına düşür.
"Hazırda Türkiyə tərəfi işləri ilin sonunadək başa çatdırmaq üçün bütün tədbirləri görür", - nazir müavini deyib.
Bakı-Tbilisi-Qars dəmir yolu Azərbaycan-Gürcüstan-Türkiyə hökumətlərarası sazişi əsasında tikilir.