"NBC Bank"ın aktivləri 30 faizdən çox artıb
Azərbaycan, Bakı, 23 aprel /Trend/
Azərbaycan bankı "NBC Bank" ASC-nin 2012-ci ilin birinci rübünün maliyyə fəaliyyətinin nəticələri uğurlu olub. Belə ki, 2011-ci ilin birinci rübü ilə müqayisədə bankın aktivlərinin həcmi 31.1% artaraq, 69 025.33 min manat təşkil edib.
Bankdan Trend-ə verilən məlumata görə, aktivlərin əsas hissəsini təşkil edən kredit portfelində də nəzərəçarpacaq artım olub. Qeyd olunan dövrdə müştərilərə (dövlət və özəl müəssisələr, fiziki şəxslər) verilən kreditlərin həcmi 29% artaraq 56 010.17 min manat təşkil edib.
Aktivlərin artımında əhalidən qəbul edilən depozitlər xüsusi roy oynayır. Əgər 31 mart 2011-ci il tarixinə bankda mövcud olan depozitlərin həcmi 14 474.11 min manat təşkil etmişdisə, 2012-ci ildə bu rəqəm 2,08 dəfə artaraq 30 215.77 min manat olub.
Təqdim olunan kreditlərin tərkibində xüsusi əhəmiyyət daşıyan şəxsi və ailə məqsədləri üçün fiziki şəxslərə verilən kreditlərin həcmi də 19% artıb. 2011-ci ilin qeyd olunan dövründə bu rəqəm 34 269.31 min manat, hesabat dövründə isə 42 177.31 min manat olub.
Əhalidən qəbul edilən depozitlərin və müştərilərə təqdim olunan kreditlərin həcminin artması vətəndaşların banka olan inamının bir göstəricisi olmaqla, bank tərəfindən həyata keçirilən düzgün maliyyə və pul-kredit siyasətinin nəticəsidir.
