Azərbaycan, Bakı, 1 may /Trend, müxbir A.Axundov/
Dünya Bankının (DB) Azərbaycanda təhsilin inkişafı üzrə ikinci layihəsi çərçivəsində Təhsil Nazirliyində və onun departamentlərində strateji planlaşdırma sistemi yaradılıb. Bu barədə çərşənbə axşamı Trend-ə bankın Bakı nümayəndəliyindən məlumat veriblər.
"11 pilot məktəbdə kitabxana fondunun vəziyyətinin yaxşılaşdırılması daxil olmaqla, məktəb təhsilində səmərəli metodologiyanın tətbiqinə başlanıb. Təhsil Nazirliyinin şəhər və kəndlərdəki şöbələri layihənin əhatə etdiyi qalan 500 məktəbin kitabxanasında oxşar tədbirlərin qəbul edilməsi ilə bağlı təlimatlandırılıb", - bankdan deyiblər.
Bundan başqa, layihə çərçivəsində ibtidai siniflərin 18 195 müəllimi treninq keçib.
"Laliyə çərçivəsində işlər qrafikə uyğun aparılır", - bankdan bildiriblər.
2008-ci ilin aprelində təsdiq edilən bu layihənin dəyəri 45,4 milyon dollar təşkil edir ki, onlardan 25 milyon dollar DB-nin kreditinin payına düşür.
2012-ci ilin fevralına olan məlumata görə, DB-nin ayırdığı vəsaitlərin 11,6 milyon dolları istifadə edilib. Layihənin 2014-cü il martın 31-də tamamlanması planlaşdırılır.
