Azərbaycan, Bakı, 2 may /Trend, müxbirlər A.Tağıyeva, Ə.Həsənov/
İqtisadi Əməkdaşlıq Təşkilatının (ECO) İnkişaf və Ticarət Bankı (ECOBANK) Azərbaycanın bankın səmdarı statusu almasında və tez bir zamanda Azərbaycan bazarına çıxmaqda maraqlıdır. Bu barədə çərşənbə günü Trend-ə ECOBANK-ın direktor müavini Fazlı Sak bildirib.
ECOBANK-ın direktoru Hüseyn Qəzavinin başçılıq etdiyi nümayəndə heyəti Bakıdadır.
"Biz aktiv inkişaf yolunda olan Azərbaycanla tanış olduq. ECOBANK Azərbaycanın layihələrində iştirakda maraqlıdır", - həm də bankın siyasət və strategiya şöbəsinin rəhbəri olan Sak deyib.
Onun sözlərinə görə, ECOBANK Azərbaycanın bankın tərkibinə daxil olması üçün ondan asılı olan hər şeyi edib. O deyib ki, gələcəkdə hər şey Azərbaycan tərəfindən asılı olacaq.
"Azərbaycan banka üzv olmaqla bağlı bütün məsələləri nə qədər tez həll edə bilsə, biz Azərbaycanın iştirakı ilə layihələrin maliyyələşdirilməsinə də bir o qədər tez başlaya bilərik. Biz Azərbaycan tərəfi ilə görüşdən sonra sazişin imzalanması üçün ölkədən dəvət gözləyəcəyik", - Sak deyib.
ECOBANK-ın prezidenti çərşənbə günü Bakıda jurnalistlərə bildirib ki, Azərbaycanın bankın kapitalında iştirak payı 3 faiz təşkil edəcək.
"Azərbaycan maraqlı olduğunu bildirdi və dörd ay əvvəl üzv olmaq üçün ərizə təqdim etdi. İndiki məqamda sənədlər hazırdır, lakin hələlik imzalanmayıb. Bankın səhmdarları sırasına daxil olmaq üçün müraciət edən Əfqanıstanla bağlı rəsmiləşdirmə işləri yekunlaşmaq üzrədir", - Qəzavi vurğulayıb.
Qəzavinin sözlərinə görə, Azərbaycanın ECOBANK-a üzv olması Azərbaycan banklarının ECOBANK-dan kreditlər almasına da imkan yaradacaq.
