Azərbaycan, Bakı, 17 may /Trend, müxbir A.Axundov/
Dünya Bankı (DB) II "Azərbaycan kənd investisiyaları" (AzRIP) layihəsi çərçivəsində Azərbaycan hökuməti ilə rəsmi danışıqlara başlayıb. Bu barədə cümə axşamı Trend-ə bankın Bakı nümayəndəliyindən bildiriblər.
"Danışıqlar mayın 16-da başlayıb", - bankdan deyiblər.
Bu məqsədlə DB-nin layihə rəhbəri Daniel Ouenin başçılıq etdiyi missiya Bakıya gəlib.
"Danışıqların ilkin nəticələri haqqında danışmaq hələ tezdir", - DB nümayəndəliyindən qeyd ediblər.
Bu danışıqlar layihənin təsdiq edilməsi prosesində sonuncu mərhələdir.
"Əgər onlar uğurla keçsə, layihə təsdiq edilməsi üçün bankın Direktorlar Şurasına göndəriləcək", - bankdan qeyd ediblər.
Bank layihənin reallaşdırılmasına Beynəlxalq Yenidənqurma və İnkişaf Bankının vəsaitlərindən 30 milyon dollar həcmində kredit ayırmağı planlaşdırır.
Yeni layihə birinci layihənin təkrarıdır, lakin ondan fərqli olaraq ölkənin bütün ərazisini əhatə etməyi nəzərdə tutur. Birinci layihənin reallaşdırılması 2012-ci ildə tamamlanacaq. İkinci layihə 2012-2017-ci illəri əhatə edir. Bundan başqa, əgər bu gün layihə yalnız 45 rayonu əhatə edirsə, ikinci layihə 56 rayonu əhatə etməyə istiqamətlənib.
