Azərbaycan, Bakı, 29 may /Trend, müxbir E.İsmayılov/
Metronun "28 may" stansiyasının əsas girişinin yenidən qurulması və modernləşdirilməsi ilə bağlı işlər 2012-ci il ərzində başlayacaq. Bu barədə çərşənbə axşamı Trend-ə Bakı Metropolitetindəki mənbə bildirib.
Onun sözlərinə görə, hökumətə artıq bir neçə layihə təqdim edilib və bu layihələrə uyğun olaraq işlər aparıla bilər.
"İşlər variantlardan biri seçildikdən sonra bu il ərzində başlayacaq. Böyük həcmdə iş nəzərdə tutulub. Stansiyanın vestibülünün yenidən qurulması ilə yanaşı, eskalatorun dəyişdirilməsi də planlaşdırılır", - mənbə deyib.
O qeyd edib ki, stansiyada işlərin aparılması üçün bu ilin dövlət büdcəsində təqribən 13 milyon manat nəzərdə tutulub.
Eskalatorun dəyişdirilməsi ilə yanaşı, onun üçdən dordzolaqlıyadək genişləndirilməsi planlaşdırlır.
Stansiyanın əsas girişinin istismara verilməsinədək sərnişinlər ikinci girişdən, habelə "Cəfər Cabbarlı" stansiyasının girişindən istifadə edə biləcəklər.
