Azərbaycan, Bakı, 13 iyun /Trend, müxbir Ə.Həsənov/
Yanvar-may aylarında Azərbaycanda sənaye istehsalı (məhsul istehsalı və sənaye xarakterli xidmətlərin göstərilməsi) 15 milyard manat təşkil edib ki, bu da 2011-ci ilin müvafiq dövr göstəricisindən 20,7 faiz çoxdur. Bu barədə Trend-ə Dövlət Statistika Komitəsindən bildiriblər.
Hasilat sənayesinin həcmi 77,5 faiz təşkil edib. Emal sənayesi 17,1 faiz, enerji və qazın paylanması və təchizatı 4,9 faiz, su təchizatı, tullantıların emalı və başqa emal sahələrinin payı isə 0,5 faiz təşkil edib.
Qeyri-neft sektorunda sənaye məhsullarının istehsalı 8,8 faiz artıb, neft sektorunda istehsalatda 5,1 faiz azalma müşahidə olunub. Hesabat dövründə neft hasilatının həcmi 18,5 milyon ton, təbii qaz 7,4 milyard kubmetr təşkil edib.
Qida, toxuculuq sənayesində, tikinti materiallarının, mebel, elektron avadanlıqların istehsalında və maşınqayırmada istehsalda artım müşahidə olunub.
