Azərbaycan, Bakı, 13 iyun /Trend, müxbir A.Axundov/
Nəqliyyat Nazirliyi "Azəryolservis" ASC Bakıda 14 piyada keçidi inşa edir. Bu barədə çərşənbə günü Trend-ə ASC-dən bildiriblər.
"Hazırda 14 keçidin tikintisi aparılır, onlardan 10-u üzrə işləri ilin sonunadək başa çatdırmağı planlaşdırırıq. Ümumilikdə son altı il ərzində 43 yerüstü və yeraltı keçid tikilib", - şirkətdən deyiblər.
Məlumata əsasən, hazırda şirkət Babək prospektində 3 yeraltı keçidin, Heydər Əliyev prospektindəki "Şəfa" stadionun qarşısında isə 1 yerüstü keçidin tikintisini aparır.
"Həmçinin, Nizami rayonunda, 8-ci kilometr qəsəbəsindəki bazar ərazisində yeraltı keçid inşa edilir. Demək olar ki, Dənizkənari Milli Parkın Dəniz Vağzalı yaxınlığındakı yeni sahəsini və "Port Baku" binasını birləşdirən yeraltı keçid açılışa hazırdır. Biz onun açılışını yaxın vaxtlarda gözləyirik", - şirkətdən vurğulayıblar.
