Azərbaycan, Bakı, 12 iyul /Trend, müxbir A.Axundov/
Azərbaycanda iqtisadiyyatın müxtəlif sektorları üçün işəgötürən tərəfindən ödənilən icbari sosial sığorta üzrə ayırmaların minimum səviyyəsinin hesablanması məqsədilə normativlər müəyyən edilə bilər.
Trend-in məlumatına görə, bu barədə cümə axşamı jurnalistlərə Dövlət Sosial Müdafiə Fondunun sədri Səlim Müslümov bildirib.
"Onlar şirkətlərin dövriyyəsindəki əməkhaqqı fondunun orta payından asılı olaraq hesablanacaqlar. Məsələn, tikinti sektorunda orta hesabla şirkətin dövriyyəsinin 20 faizi əməkhaqqı fonduna düşür. İşə götürən tərəfindən göstərilmiş maaşlar bu səviyyədən aşağı ola bilər. Ancaq minimum ayırmalar bu səviyyədən başlayaraq ödəniləcək. Əgər maaşlar normativdən yuxarı olacaqsa, ayırmalar fakt üzrə yığılacaq. Bu normativlər iqtisadiyyatın sektorlarından asılı olaraq fərqlənəcək", - Müslümov deyib.
Onun sözlərinə görə, bu, qeyri-leqal əmək fəaliyyəti və Azərbaycanda vətəndaşların real əməkdaqlarının məbləğinin işəgötürən tərəfindən gizlədilməsi ilə mübarizə tədbirlərindən biridir.
"Yaxın günlərdə qeyri-leqal məşğulluq və real əməkhaqların real məbləğinin gizlədilməsinə qarşı radikal tədbirlərin görülməsi üçün ölkə hökumətinə sosial sığorta və əmək pensiyaları haqqında qanunlara dəyişiklik edilməsi barədə təkliflərimizi təqdim edəcəyik", - Müslümov deyib.
Onun sözlərinə görə, analoji səlahiyyətlər Vergilər Nazirliyinə və Dövlət Gömrük Komitəsinə həvalə olunub.
