Azərbaycan, Bakı, 13 avqust /Trend, müxbir A.Axundov/
Azərbaycan Əmanətlərin Sığortalanması Fondu (ADIF) üç agent bank vasitəsilə fiziki şəxslərə müflisləşmiş "Royal Bank" ASC-nin sığortalanmış əmanətlərinin 60 faizindən çoxunun qaytarılması üçün kompensasiyalar ödəyiblər. Bu barədə bazar ertəsi Trend-ə ADIF-in icraçı direktoru Azad Cavadov bildirib.
"Avqustun 1-dən "Royal Bank" ASC-nin sığortalanmış əmanətçilərinə kompensasiyaların ödənilməsi üçün ADİF tərəfindən seçilən üç agent bank 9,8 milyon manat məbləğində ödəniş həyata keçirib. Ümumilikdə isə 16 milyon manat vəsaitin ödəniləcəyi güman edilir", - Cavadov bildirib.
Göstərilən məbləğdən 7,329 milyon manat milli valyutada, 2,41 milyon manat ABŞ dollarında, 60,8 min manat avroda ödənilib.
"Kompensasiyaların 77,8 faizi manatla ödənilib. Xarici valyutada kompensasiyaları əsasən qeyri-rezidentlər, milli valyutada isə Azərbaycan vətəndaşları alıblar", - Cavadov deyib.
Bu günədək 898 əmanətçi kompensasiya alıb. Onlardan 394-ü kompensasiyaları "Muğanbank"dan (ümumi məbləği 4,789 milyon manat), 278-i "AGBank"dan (3,093 milyon manat) , 226-sı "Bank Respublika"dan (1,917 milyon manat) alıblar.
Fond əsas ödənişləri avqustun 15-dək ödəməyi planlaşdırır. Ödəmə prosesi 2013-cü il iyulun 20-dək davam edəcək.
"Əmanətçilər kompensasiyalara görə müraciət etməyə tələsməməlidirlər. Kompensasiyalara görə müraciət edən şəxslər onları qısa müddətdə alacaqlar", - Cavadov deyib.