Azərbaycan, Bakı, 14 avqust /Trend, müxbir A.Axundov/
Türkiyə özünün sənaye zonalarının yaradılması sahəsində təcrübəsini Azərbaycanla bölüşməyə hazırdır. Bu barədə Türkiyənin iqtisadiyyat naziri Zəfər Çağlayan çərşənbə axşamı Bakıda Şuranın üzvü olan ölkələrin iqtisadiyyat nazirləri ilə ikinci görüşdə çıxışı zamanı bildirib.
Bu gün Bakıda Türkdilli Dövlətlərin Əməkdaşlıq Şurasının iqtisadiyyat nazirlərinin ikinci görüşü keçirilib. Görüşdə tərəfər arasında hazırkı vəziyyət və əməkdaşlığın genişləndirilməsinin perspektivləri müzakirə olunub.
Çağlayanın sözlərinə görə, yaxın vaxtlarda onun dəvəti ilə Azərbaycanın iqtisadi inkişaf naziri Şahin Mustafayevin başçılıq etdiyi nümayəndə heyətininTürkiyəyə səfəri baş tutacaq.
"Azərbaycanın nümayəndə heyəti Türkiyənin iqtisadiyyatın müxtəlif sahələrində, o cümlədən sənaye, turizm, informasiya texnologiyaları və s. sahələrdə təcrübəsini öyrənəcək. Türkiyədə investisiyaların təşviqi sistemi öyrəniləcək", - Çağlayan deyib.
Bu görüşün ardından Çağlayanın rəhbərlik etdiyi nümayəndə heyətinin Azərbaycana qısamüddətli səfəri olacaq.
"Həmin növbəti səfər zamanı biz Sumqayıt Texnologiya Parkına baş çəkmək fikrindəyik. Türkiyə sənaye zonalarının yaradılması sahəsində zəngin təcrüdbəyə malikdir və onu Azərbaycanla bölüşməyə hazırdır", - Çağlayan bildirib.
Onun sözlərinə görə, Sumqayıtda Türkiyə xüsusi iqtisadi zonasının (Türk Özel Ekonomi Bölgesi) yaradılması istisna edilmir. Tərəfdaş ölkələrdə belə zonaların yaradılması türk biznesinin xaricdə inkişafı siyasətinin əsas istiqamətlərindən biridir.