Azərbaycan, Bakı, 10 sentyabr /Trend, müxbir E.İsmayılov/
İlin sonunadək "Memar Əcəmi - Həzi Aslanov" marşrutu üzrə Bakı Metropoliteninin yeni xətləri və stansiyalarının texniki-iqtisadi əsaslandırılmasının hazırlanması prosesi başa çatacaq. Trend-in məlumatına görə, bu barədə bazar ertəsi Bakıda jurnalistlərə Ukraynanın "Укрспецтоннельпроект" şirkətinin nümayəndəsi, layihənin baş mühəndisi Yevgeni İqnatoviç bildirib.
Onun sözlərinə görə, şəhərsalma şəraiti və bu istiqamətdə tələblərdən asılı olaraq, iki və ya üç stansiyanın layihəsi hazırlanacaq.
"Böyük ehtimalla bu, üç stansiya olacaq", - İqnatoviç qeyd edib.
Hazırda məlumatların toplanması, xüsusən, çəkiliş, arxitektura qərarları üzrə işlər aparılır. Həmçinin, qrunt sularının səviyyəsi ilə bağlı geoloji məlumatları dəqiqləşdirmək lazımdır.
İqnatoviçin sözlərinə görə, 2013-cü ildə işçi sənədləşdirilməsinin hazırlığı üzrə işlər aparılacaq və maliyyə ilə bağlı problemlər olmadığı təqdirdə, gələn il tikinti işləri başlaya bilər.
Tikinti işlərini Ukraynanın "İnterbudtonnel" ("Интербудтоннель") şirkəti aparacaq. Şirkət, "Укрспецтоннельпроект" kimi, "İnterbudmontaj" ("Интербудмонтаж") tikinti assosiasiyasına daxildir.