Azərbaycan, Bakı, 12 sentyabr /Trend, müxbir Ə.Həsənov/
2012-ci ilin yanvar-iyun aylarında xaricdən cəlb olunmuş kapitalın ümumi həcmi 4.4 mlrd. dollar (ötən ilin analoji dövrü ilə müqayisədə 10,2 faiz artım) təşkil edib. Bu göstərici əsasən ölkəyə cəlb olunmuş birbaşa investisiyaların və xarici kreditlərin hesabına formalaşıb. Trend-in məlumatına görə, bu barədə Azərbaycan Mərkəzi Bankının yaydığı 2012-ci ilin yanvar-iyun ayları üçün ölkənin tədiyə balansında deyilir.
Birbaşa investisiyalar formasında xaricdən cəlb olunmuş sərmayələrin ümumi məbləği 2.5 mlrd. dollar olub. Bu investisiyaların strukturunda neft-qaz sektorunun xüsusi çəkisi 81.9% təşkil edib. Cəlb olunmuş sərmayələr iri neft-qaz layihələrinin, əsasən BP Eksploreyşn (Şah Dəniz) Ltd. layihəsi və Azərbaycan Beynəlxalq Əməliyyat Şirkətinin Azəri-Çıraq-Günəşli yatağında görülən işlərin maliyyələşdirilməsi ilə əlaqədar ölkə iqtisadiyyatında istifadə olunub.
Qiymətləndirmələrə görə, qeyri-neft sektoruna cəlb olunmuş birbaşa investisiyaların ümumi məbləği 451.3 mln. dollar olmuşdur. Bu da ölkəyə cəlb olunmuş birbaşa xarici investisiyaların ümumi həcminin 18.1%-ni təşkil edib.
