Azərbaycan, Bakı, 27 sentyabr /Trend, müxbir A.Axundov/
Azərbaycan və Niderland qarşılıqlı ticarətin həcmini artırmağa çalışırlar. Trend-in məlumatına görə, bu barədə cümə axşamı jurnalistlərə Niderlandın Azərbaycandakı səfiri Aryen Uyterlinde deyib.
"Ötən il Niderland Azərbaycana 115 milyon dollar məbləğində məhsul ixrac edib. Digər ölkələrə ixracat ilə müqayisədə bu rəqəm azdır. Bu, gələcəkdə əmtəə dövriyyəsinin böyük artım potensialından xəbər verir", - Uyterlinde qeyd edib.
Onun sözlərinə görə, mal dövriyyəsinin xeyli hissəsi Niderlandın ixrac etdiyi avadanlıq, materiallar, qida məhsulları və güllərin payına düşür.
"Əmtəə dövriyyəsini yüksəltmək istədiyimiz müəyyən səviyyə yoxdur. Biz onu imkan olduqca artırmağa çalışırıq. Bu, bazar və sahibkarlardan asılıdır", - səfir vurğulayıb.
Onun sözlərinə görə, Niderland Azərbaycanın Ümumdünya Turizm Təşkilatına üzv olmaq niyyətini dəstəkləyir.
"Bu, xarici şirkətlərlə işi yüngülləşdirəcək. Biz bunu vacib hesab edirik və Azərbaycanın bu istiqamətdə apardığı danışıqları dəstəkləyirik", - Uyterlinde bildirib.
