Azərbaycan, Bakı, 2 oktyabr /Trend, müxbir A.Axundov/
"Anglo-Asian Mining plc" şirkəti (Azərbaycanda qızıl istehsalçısı) 2012-ci ilin sonu üçün qızıl hasilatına dair proqnozu azaldıb. Trend-in məlumatına görə, bu barədə çərşənbə axşamı şirkətin məlumatında deyilir.
"Bu il havaların çox soyuq keçməsi səbəbindən istehsal üzrə göstəricilər planlaşdırılandan az olub. Lakin ilin ikinci yarısında istehsalın yüksək olacağı gözlənilir. Buna baxmayaraq, biz ilin sonu üçün proqnozu yenidən nəzərdən keçirdik və ilin yekunları üzrə qızıl istehsalı həcminin 49-51 min unsiya (əvvəl proqnoz 54 min unsiya təşkil edib) səviyyəsində olmasını gözləyirik", - məlumatda deyilir.
Şirkət cari ilin ilk yarımilliyində Gədəbəy qızıl yatağından 21641 unsiya qızıl istehsal edib. İkinci rübdə qızıl istehsalı 11716, birinci rübdə 9925 unsiya qızıl təşkil edib.
Bununla belə, şirkət gümüş istehsalı üzrə proqnozu saxlayıb və bu il 26 min unsiya istehsal etməyi planlaşdırır. Şirkət ikinci rübdə 4504 unsiya, ilk yarımillikdə isə 12174 unsiya gümüş istehsal edib.
Şirkət ikinci rüb rəzində 9883 unsiya qızılı orta hesabla 1 unsiyaya görə 1609 dollara, 6 ay ərzində isə 18135 unsiya qızılı 1 unsiyaya görə orta hesabla 1644 dollara satıb.