Azərbaycan, Bakı, 7 noyabr/ Trend, müxbir A.Axundov /
"Bank VTB" MMC (Azərbaycan) topdansatış kreditləşdirmənin aylıq həcmini ilin əvvəli ilə müqayisədə səkkiz dəfə artırıb. Bu barədə çərşənbə günü Trend-ə bankın idarə heyətinin sədri Aleksandr Yeremin bildirib.
Onun sözlərinə görə, bu gün bankın kredit portfelinin 36 faizi korporativ biznesin, 39 faiz avtomobil kreditləşməsinin, 21 faiz kiçik və orta müəssisələrə (KOM) verilən kreditlərin, qalan dörd faiz POS-kreditlərin, nağd kreditlərin və başqa xırda kreditlərin payına düşür.
"Bank avtomobillərin kreditləşdirilməsi sahəsində çox fəaldır. Biz "KIA" və "Chevrolet" kimi ən məşhur kütləvi markaların mərkəzi avtomobil salonlarındayıq, "Hyundai" şirkəti ilə aktiv əməkdaşlığa başlayırıq. Bütovlükdə bank fəal şəkildə işlədiyimiz 15-dən çox avtomobil satışı tərəfdaşına malikik. Bu gün biz bilavasitə avtosalonlarda əməkdaşlarımız üçün səkkiz iş yeri açmışıq. Və bütün bunlar bir il ərzində baş verib. Bankda avtomobil krediti portfeli kifayət qədər tez inkişaf etməyə başladı, çünki biz sorğuya bankın reaksiya sürəti və məhsulun qiymətinin arasında yaxşı nisbət təklif etdik", - Yeremin deyib.
Onun sözlərinə görə, bank hələ nağd kredit verməkdə çox aktiv deyil, çünki bu kreditin verilməsi qərarların qəbul olunmasının yaxşı qaydaya salınmış avtomatlaşdırılmış mərkəzləşdirilmiş sistemi olmadan mümkün deyil. "İndi biz belə sistemi yaradırıq və gələn ilin başlanğıcından nağd kreditlərin fəal şəkildə verilməsinə başlamağı planlaşdırırıq. Növbəti ildə biz nağd kreditlər üzrə bankın portfelinin həcminin əhəmiyyətli artımını proqnozlaşdırırıq. 2012-ci ildə bankın kütləvi bazara bu xidmətləri keyfiyyətlə təklif edə bilməsi üçün texnologiyalar, prosedurlar və İT sistemləri nöqteyi-nəzərindən böyük iş görülüb", - Yeremin qeyd edib.
Bundan əlavə, onun sözlərinə görə, "Bank VTB" (Azərbaycan) kiçik biznesin kreditləşdirilməsi seqmentinə də diqqət yetirib.
"Bu layihəyə biz bu il sıfırdan başlamışıq və aydındır ki, 10 ay ərzində bazarın liderlərinə yaxınlaşmaq mümkün deyil. Ancaq biz bu portfelin inkişafı üçün qoyulmuş bütün planları yerinə yetirdik və əminik ki, yaxın gələcəkdə bu bazarın bərabər hüquqlu oyunçusu olacağıq. İndi bizim fəaliyyətimiz 100 mindən 1,5 milyon dollara qədər diapazonda kredit verməyə yönəldilib. Bizim planlarımıza görə, bu portfel bankın ümumi portfelinin üçdə birini təşkil edəcək. Ancaq bankın inkişafı və kiçik biznesə kredit verilməsi üzrə mütəxəssislərin lazımlı bazasının formalaşması müddətində biz, sözsüz ki, mikrokreditləşmə ilə də məşğul olacağıq. Qrup bütün bunlar üçün lazım olanlara - texnologiyalara, prosedurlara, müştərilərə xidmətin və risk-menecment xidmətinin avtomatlaşdırılmış sistemlərinə, müxtəlif ölkələrdə belə layihələrin uğurlu reallaşdırmasının nəhəng təcrübəsinə malikdir", - Yeremin deyib.
