Azərbaycan, Bakı, 26 noyabr / Trend, müxbir A.Tağıyeva/
Fars körfəzinin Ərəb Dövlətlərinin Əməkdaşlıq Şurası ölkələrinin ticarət palataları İran Ticarət Palatası ilə əməkdaşlığın dayandırılması haqqında qərar qəbul edib. Bu barədə Səudiyyə Ərəbistanının "Əl-İqtisadiyyə" qəzetinə Omanın Ticarət Palatasının üzvü Kamilə əl-Əufi bildirib.
Onun sözlərinə görə, Şuraya daxil olan ticarət palataları İranla ticarət sazişlərini yeniləməməyi qərara alıblar və buna səbəb Qərb dövlətlərinin İrana qarşı tətbiq etdiyi sanksiyalar, eləcə də İran rialının məzənnəsinin kəskin şəkildə düşməsi olub.
Əl-Əufi qeyd edib ki, bəzi ticarət palataları sanksiyaların tətbiqinə qədər imzalanmış qüvvədə olan razılaşmaların müddəti qurtaranadək İranla əməkdaşlığı davam edəcək.
Sentyabrda İranda milli valyutanın dollara nisbətdə məzənnəsinin kəskin düşməsi müşahidə olunub. Belə ki, sentyabrın ortalarında İranın sərbəst bazarlarında bir dollara 36 min rial verirdilər. Bundan sonra dolların riala nisbəti bir qədər düzəlsə də, stabil olaraq yüksək qalmaqdadır.