Azərbaycan, Bakı, 27 noyabr /Trend, müxbir C.Nəsibova/
Azərbaycanın gələcəkdə Argentinadan cins mal-qara idxal edəcəyi istisna olunmur, lakin bu, ilkin olaraq bir sıra məsələlərin, o cümlədən, yem məsələsinin həll olunmasını tələb edən mürəkkəb prosesdir. Trend-in məlumatına görə, bu barədə çərşənbə axşamı jurnalistlərə Azərbaycanın kənd təsərrüfatı naziri İsmət Abasov bildirib.
"Argentinadan Azərbaycana mal-qara tədarükünün inkişafı üçün müəyyən məsələlər, həmçinin bu heyvanlar üçün yemin və suyun keyfiyyətinin müzakirəsi və razılığın əldə olunması məqsədilə hər iki ölkənin bu sahədə çalışan sahibkarlarının görüşlərini təşkil etmək lazımdır", - Abasov deyib.
Onun sözlərinə görə, heyvandarlığın inkişafında öz növbəsində bitkiçilikdən asılı olan yem bazası çox böyük əhəmiyyətə malikdir ki, bu sahənin də inkişaf etdirilməsi planlaşdırılır.
Nazirin qeyd etdiyi kimi, böyük məsafəyə baxmayaraq, ölkələr arasında yaxşı siyasi münasibətlər mövcuddur ki, bu da əməkdaşlığın sonrakı inkişafına xidmət edəcək.