Azərbaycan, Bakı, 27 noyabr /Trend, müxbir A.Axundov/
Maliyyə Nazirliyi yanında Dövlət Sığorta Nəzarəti Xidməti sığorta bazarının kapitallaşdırılmasının indiki səviyyəsini qənaətbəxş hesab edir. Trend-in məlumatına görə, bu barədə çərşənbə axşamı jurnalistlərə Dövlət Xidmətinin sədri Namiq Xəlilov deyib.
"İndiki mərhələdə Azərbaycanın sığorta bazarının inkişafı, sığorta şirkətlərinin kapitallaşdırılması olduqca qənaətbəxşdir. Kapitalın artırılması proqramı gələn il başa çatır, minimum tələb 5 milyon manata çatdırılacaq. Müəyyən təhlildən sonra biz bu istiqamətdə növbəti təkliflər verəcəyik", - Xəlilov qeyd edib.
Onun sözlərinə görə, növbəti 3 il üçün sığorta bazarının iştirakçılarının minimum kapitalına qarşı tələblərin artırılmasına dair qərar gələn ilin sentyabrında qəbul ediləcək.
