Azərbaycan, Bakı, 11 dekabr /Trend, müxbir A.Axundov/
"Paşa Bank" yerli bazarda ARDNŞ-nin (Azərbaycan Respublikası Dövlət Neft Şirkəti) qiymətli kağızlarının buraxılışında iştirak etməyə hazırdır. Bu barədə çərşənbə axşamı Trend-ə bankın İdarə Heyətinin sədri Fərid Axundov bildirib.
"Azərbaycanda qiymətli kağızlar bazarının inkişafı üzrə müəyyən məqsədlərə malik bank kimi bu buraxılışda iştirak etmək bizə maraqlı olardı. Ümid edirəm ki, biz yaxın vaxtlarda sövdələşmənin parametrləri barədə öyrənəcəyik. Biz qiymətli kağızların yerli bazarda yerləşdirilməsi üzrə öz xidmətlərimizi təklif etməyə hazırıq", - Axundov deyib.
Onun sözlərinə görə, bu yerləşdirmə qiymətli kağızların yerli bazarı üçün əlamətdar hadisədir.
"Bizim balansımız ARDNŞ-nin qiymətli kağızlarının bütün buraxılışının marketmeykeri kimi xidməti göstərməyə icazə vermir, amma biz bu məsələdə başqa banklarla birgə işləyə bilərik", - Axundov qeyd edib.
Bir müddət əvvəl ARDNŞ-nin prezidenti Rövnəq Abdullayev şirkətin gələn il ölkənin qiymətli kağızlar bazarında yerləşdirilməsi üçün 500 milyon manata yaxın məbləğdə korporativ istiqrazların buraxılışını planlaşdırdığını bildirmişdi.