...

Elman Rüstəmov: Azərbaycanın bank sistemində təmərküzləşmə və iriləşmə prosesi başa çatdırılmalıdır

Biznes və iqtisadiyyat xəbərləri Materials 17 Dekabr 2012 11:54 (UTC +04:00)

Trend-i buradan izləyin

Azərbaycan, Bakı, 17 dekabr /Trend, müxbir İ.Xəlilova /

Azərbaycan Mərkəzi Bankı (AMB) bank şöbələri şəbəkəsinin genişləndirilməsi vasitəsilə bank sisteminin və institusional inkişafın iriləşdirilməsi üçün banklarla aktiv dialoq aparır. Trend-in məlumatına görə, bu barədə Mərkəzi Bankın İdarə Heyətinin sədri Elman Rüstəmov jurnalistlərə bildirib.

"Biz ölkənin bank sistemində müəyyən iriləşmə gözləyirik. Bu gün demək olar ki, bankların 87 faizi kapitallaşma üzrə yeni normativ tələbləri yerinə yetirir. Bir sıra banklar kapitalı doldura bilmir, buna görə bazarda rəqabətədavamlılığın saxlanılması üçün onların hətta orta banklarla birləşmək şansından istifadə etmələri lazımdır", - Rüstəmov deyib.

Onun sözlərinə görə, bu gün 2003-cü illə müqayisədə üç dəfə artan Azərbaycan iqtisadiyyatının yeni miqyası şəraitində bankların kapital mövqelərini gücləndirmələri vacibdir.

"Qısa müddətdə ölkədə adambaşına ÜDM 400 dollardan 8000 dollara qədər, yəni 20 dəfə artıb. Və bu miqyaslarla banklar rəqabətədavamlılıq, bazarda müəyyən mövqeyin saxlanılması, əhaliyə bank xidmətlərinin geniş çeşidinin təqdim olunması üçün kapitalın lazımi həcminə malik olmalıdırlar", - Mərkəzi Bankın rəhbəri deyib.

Rüstəmovun qeyd etdiyi kimi, bank sistemində təmərküzləşmə həm də bazar iqtisadiyyatının formalaşması vaxtlarından başlanmış tarixi tendensiyadır: banklar nə qədər böyük olarsa, onlar bazarda bir o qədər rəqabətə davamlı və daha gəlirli olarlar.

"Bu tendensiya Azərbaycan iqtisadiyyatına da xasdır, son 15 il ərzində ölkənin bank sistemində 250 sayda bankın ixtisarı müşahidə olunub və bankların sayı indi 43-dür. Bu, öz növbəsində, ölkənin bank bazarında beşpilləli mərkəzləşmə və birləşmə faktını təsdiqləyir", - Rüstəmov deyib.

Ancaq, onun fikrincə, bu təmərküzləşmə və iriləşmə prosesi başa çatmalıdır və bu, monobankın yaradılması yolu deyil.

"Əgər Azərbaycanla qonşu ölkələrin və Azərbaycan iqtisadiyyatı ilə eyni həcmə malik ölkələrin göstəricilərinə, həmçinin onlardakı bankların sayına baxsaq, bu ölkələrdə bank sektorunun iriləşdirilməsinin bankların sayının artımı hesabına deyil, əhalinin hər 100 min nəfərinə düşən bank şöbələrinin şəbəkəsinin genişlənilməsi vasitəsi ilə baş verdiyini görərik", - Rüstəmov deyib.

O, buna nümunə kimi Azərbaycanda "Poçtbank"ın yaradılmasını misal gətirib. "Bu da onun 1200 ədəd şöbəsindən ibarət ən geniş şəbəkəsi vasitəsilə respublikanın ən ucqar kəndlərində əhaliyə maliyyə xidmətlərinin göstərilməsinə imkan verir. Müvafiq olaraq, ölkədə bank sektorunun institusional inkişafı eyni məcrada baş verməlidir, yəni yüksək sıxlığa malik məntəqələrdə əhalinin maliyyə xidmətlərindən istifadə etmələri üçün bankların şöbələri yaradılmalıdır. Və bunun üçün yüzlərlə bankı saxlamaq məqsədəuyğun deyil, çünki onları kapitallaşdırmaq qeyri-mümkündür", - Rüstəmov deyib.

Məqalədə:
Xəbər lenti

Xəbər lenti