Azərbaycan, Bakı, 3 oktyabr /Trend, müxbir T.Cəfərov/
İranın ticarət, mədənlər və sənaye naziri Məhəmmədrza Nemətzadə İranın qeyri-neft sektoru sahəsində ixracat üzrə Təbrizdə keçirilən konfrans çərçivəsində İqtisadi Əməkdaşlıq Təşkilatının (İƏT- EKO) Baş katibi Şamil Ələsgərovla görüşüb. Trend-in məlumatına görə, bu barədə İRNA agentliyi məlumat verir.
Görüşdə iranlı nazir deyib ki, ölkəsi dünya bazarında İranın payını artırmaq və iqtisadi sahədə İƏT-ə üzv ölkələrlə əlaqələrini inkişaf etdirməkdə maraqlıdır. Nemətzadə bildirib: "Hazırda iqtisadi əlaqələrimizi inkişaf etdirmək məqsədilə siyasi əlaqələri yaxşılaşdırmağa və bəzi qanunlarda islahat aparmağa çalışırıq".
İƏT-in Baş katibi Şamil Ələsgərov da öz növbəsində bildirib ki, İƏT-ə üzv ölkələr arasında ticarətin elektronlaşdırılması istiqamətində işlər görülüb: "İstehsal xərclərinin azaldılması ilə İƏT-ə üzv ölkərdə istehsal olunan məhsullar dünya bazarlarında rəqabət aparmaq gücünə malik olacaqlar".
