Azərbaycan, Bakı, 19 oktyabr /Trend, müxbir H.Vəliyev/
2013-cü ilin yanvar-sentyabr aylarının yekunu üzrə Azərbaycanın metallurgiya sənayesi və hazır metal məmulatları istehsal edən müəssisələri tərəfindən 291,6 milyon manat məbləğində məhsul istehsal edilib və xidmət göstərilib. Trend-in məlumatına görə, bu barədə Dövlət Statistika Komitəsinin hesabatında deyilir.
Metallurgiya sənayesində istehsalın həcmi ötən ilin analoji dövründə qeydə alınan göstəriciyə nisbətən 0,1 faiz artıb, hazır metal məmulatlarının istehsal həcmi isə 49,7 faiz azalıb.
Yanvar-sentyabr aylarının yekunları üzrə tökmə çuqun istehsalı 1,5 min ton təşkil edib ki, bu da 2012-ci ilin analoji dövr göstəricisindən 2 dəfə çoxdur. Bu dövrdə 53,9 min ton tökmə polad, 23,6 min ton polad boru istehsal olunub.
2013-cü ilin yanvar-fevral aylarının yekunlarına görə, qara metallardan hazırlanan yarımfabrikatların ixrac həcmi 12,6 min ton (12,5 milyon dollardan çox) təşkil edib ki, bu da 2012-ci ilin analoji dövr göstəricisindən 73,3 faiz (pulla ifadədə 92,6 faiz) çoxdur.
Qara metallardan hazırlanan boruların ixracı 40 min ton (38,6 milyon dollardan çox) təşkil edib ki, bu da 2012-cu ilin müvafiq dövr göstəricisindən 26,3 faiz çoxdur.
2013-cü ilin yanvar-sentyabr aylarının yekunlarına görə, qara metallardan hazırlanan yarımfabrikatların ixrac həcmi 70,8 min ton (34,7 milyon dollardan çox) təşkil edib ki, bu da 2012-ci ilin analoji dövr göstəricisindən 24 (pulla ifadədə 29 faiz) azdır.
