Azərbaycan, Bakı, 8 noyabr /Trend, müxbir E.Əliyev/
Azərbaycanda ödəniş kartlarının sayı sentyabrda cüzi artaraq (avqustla müqayisədə 0,3 faiz) 5,347 milyon ədədə çatıb.
2012-ci ilin müvafiq dövrünün göstəricisi ilə müqayisədə onların sayı 8,6 faiz artıb. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
Sentyabrda bankomat və POS-terminallar vasitəsilə ödəniş kartları üzrə ümumi dövriyyə 833 milyon manat, əməliyyatların ümumi sayı isə 5,618 milyon ədəd təşkil edib.
Debet kartlar üzrə əməliyyatların ümumi sayı 4,59 milyon ədəd, dəyəri isə 682 milyon manat olub.
Ölkə daxilində debet kartlar üzrə əməliyyatların ümumi sayından bankomatlar vasitəsilə 617 milyon manat məbləğində 3,086 milyon, POS-terminallar vasitəsilə 44 milyon manat məbləğində 499 min əməliyyat yerinə yetirilib.
2013-cü ilin sentyabrında kredit kartları üzrə 151 milyon manat məbləğində 1 milyon 28 min əməliyyat həyata keçirilib.
Hesabatda deyilir ki, kredit kartları ilə bankomatların köməyi ilə aparılan əməliyyatların ümumi həcmindən 75 milyon manat həcmində 318 min əməliyyat, POS-terminallar vasitəsilə isə 60 milyon manat məbləğində 302 min əməliyyat aparılıb.
2013-cü il sentyabrın 1-nə olan məlumata əsasən, ölkədə 2396 bankomat fəaliyyət göstərib, onlardan 1355 ədədi Bakıda, 1041 ədədi isə ölkənin digər şəhər və rayonlarında yerləşir.
Bankomatların ümumi sayı il ərzində 172 ədəd və ya 7,7 faiz artıb.
2013-cü il oktyabrın 1-nə olan məlumata görə, POS-terminalların sayı 35 152 ədəd təşkil edib ki, onlardan 31 068 ədədi Bakıda, 4084 ədədi isə digər şəhər və rayonlarda yerləşir.
POS-terminalların sayı 2012-ci ilin sentyabrından etibarən 1550 ədəd və ya 4,3 faiz azalıb.