Azərbaycan, Bakı, 18 noyabr /Trend, müxbir E.Əliyev/
Azərbaycanla Rusiya arasında investisiyaların qarşılıqlı təşviqi və müdafiəsi haqqında saziş layihəsi üzrə danışıqların növbəti mərhələsi nəticəsiz başa çatıb. Bu barədə bazar ertəsi Trend-ə danışıqların iştirakçılarından biri məlumat verib.
Mənbə deyib: "Rusiya ilə Azərbaycan arasında investisiya sazişi paraflanma nəticəsində yenidən təxirə salınıb".
Danışıqların iştirakçısının qeyd etdiyi kimi, Azərbaycan tərəfi rusiyalı həmkarlarının düzəliş və əlavələrlə bağlı təklifləri ilə razılaşmalarına baxmayaraq, tərəflər bir sıra prinsipial məsələlər üzrə razılığa gələ bilməyiblər.
Mənbə əlavə edib: "Ona görə də Bakıda keçirilən danışıqlar nəticəsiz başa çatıb".
İnvestisiya sazişinin imzalanmasını əngəlləyən əsas amillərdən biri ondan ibarətdir ki, iki ölkənin hökumətləri hələlik sazişin şamil edilməsi ilə bağlı bu və ya digər müddət məsələsində razılığa gələ bilmirlər. Belə ki, Azərbaycanın təklif etdiyi ssenarinin qəbul ediləcəyi halda Rusiya Federasiyası ərazisindəki bəzi əmlak obyektlərinin özəlləşdirilməsinin nəticələri məhkəmə qaydası ilə ləğv edilə bilər. Azərbaycan sazişin Azərbaycanla Rusiyanın bütün əməkdaşlığı tarixinə, Rusiya isə 1992-ci ildən başlayan dövrünə şamil edilməsində təkid edir.
