Azərbaycan, Bakı, 25 noyabr /Trend, müxbir E.Əliyev/
Bütün ikitərəfli əməkdaşlıq dövründə Azərbaycan iqtisadiyyatının qeyri-neft sektoruna amerikalı sərmayəçilər tərəfindən qoyulan investisiyaların ümumi həcmi təxminən 880 milyon dollar təşkil edir. Trend-in məlumatına görə, bu barədə bazar ertəsi Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov Bakıda keçiriləcək Azərbaycan-ABŞ biznes forumu ərəfəsində jurnalistlərə bildirib.
R.Məmmədov deyib: "Azərbaycana müxtəlif sahələr üzrə ixtisaslaşmış iri ABŞ şirkətlərinin nümayəndələri gəliblər. Məlum olduğu kimi, Azərbaycanla ABŞ-ın əməkdaşlığı hərtərəflidir. Ölkəmizdə ABŞ sərmayələri ilə 220 şirkət çalışır".
Onun sözlərinə görə, forumun keçirilməsində məqsəd iqtisadi əməkdaşlığın gələcəkdə intensivləşdirilməsidir: "Söhbət həm ticarət dövriyyəsinin artırılmasından, həm də qarşılıqlı fəaliyyətin intensivləşdirilməsinin inkişafından gedir. Ümumilikdə, forumun gedişində müxtəlif, o cümlədən energetika, kimya sənayesi, məişət texnikasının istehsalı və s. sahələrdə əməkdaşlığın potensialı müzakirə olunacaq".