Azərbaycan, Bakı, 4 fevral /Trend, müxbir A.Axundov/
Asiya İnkişaf Bankı (AİB) 2014-cü ildə Azərbaycanda yol tikintisi (Second Road Network Development Investment Program - Yol şəbəkəsinin inkişafı üçün II investisiya proqramı) üçün ölkəyə yeni multitranş maliyyələşdirilməsi (MFF) çərçivəsində ikinci kredit verəcək. Trend-in məlumatına görə, bu barədə 2014-2016-cı illərdə Azərbaycanda bankın əməliyyatları üzrə biznes planda deyilir.
Sənəddə qeyd olunur ki, bank bu məqsədlə 150 milyon dollar ayırmaq niyyətindədir, hərçənd daha əvvəl 120 milyon dollar təqdim etmək planlaşdırılmışdı.
Yeni yol layihəsinin ümumi dəyəri 200 milyon dollar olacaq, bu məbləğin 50 milyon dolları Azərbaycanın layihədə iştirak payına düşür.
Qeyd edək ki, avtomobil yollarının tikintisi üzrə ikinci multitranş zərfi 2012-ci ilin noyabr ayında 500 milyon dollar həcmində təsdiq edilmişdi. Proqram iki hissədən ibarət - Masallı-Cəlilabad (32,2 kilometr) və Cəlilabad-Şorsulu (30 kilometrdən artıq) - 63 kilometr uzunluğunda olan Masallı-Şorsulu avtomobil magistralının tikintisini nəzərdə tutur.
