Azərbaycan, Bakı, 20 fevral /Trend, müxbir E.Əliyev/
Azərbaycanda mikromaliyyələşməyə tələb zamanla azalmayacaq. Azərbaycan Mikromaliyyə Assosiasiyasının (AMA) sədri Süleyman Kələşov belə hesab edir.
S.Kələşov Trend-ə bildirib ki, ümumilikdə ölkədə mikromaliyyələşmə bazarının vəziyyətini yaxşı kimi qiymətləndirmək olar: Belə ki, bu alətə dövlət dəstəyi var, bunun üçün bütün imkanlar mövcuddur. Bundan əlavə, ölkədə fəaliyyət göstərən bank olmayan kredit təşkilatları, kredit ittifaqları kifayət qədər olmasa da, həm daxili, həm də əcnəbi investorların hesabına cəlb edilən maliyyə resursları ilə təmin olunublar".
Lakin ekspertin sözlərinə görə, bank olmayan kredit təşkilatları (BOKT) müəyyən çətinliklərlə üzləşirlər: "İş burasındadır ki, son vaxtlar kommersiya bankları mikromaliyyələşdirmə seqmentinə daha fəal daxil olurlar. Öz növbəsində, banklar mikromaliyyələşdirmə ilə məşğul olmur, üstünlüyü korporativ müştərilərə verirlər. Eyni zamanda, bu gün Azərbaycanda, xüsusilə, ölkənin regionlarında korporativ müştərilər bir o qədər də çox deyil. Bunun həm subyektiv, həm də obyektiv səbəbləri var".
Onun sözlərinə görə, əsas səbəblərdən biri müstəqil Azərbaycanda bazarın tarixinin kifayət qədər qısa olmasıdır: "Zəruri qanunvericilik bazasının formalaşdığı 90-cı illərin ortalarında aqrar islahatlar başlayanda keçmiş kolxozlar və sovxozlar ləğv edildilər. Onların yerini Azərbaycan əhalisinin mühüm hissəsini təşkil edən 850 mindən artıq fərdi təsərrüfat tutdu. Belə çoxlu sayda təsərrüfat subyektinin korporativ seqmentdə birləşdirilməsi məsələsini həll etmək çox çətindir. Həmin proseslər bu gün də davam edir. Buna baxmayaraq, hazırda regionlarda korporativ müştərilər özəl müştərilərdən xeyli azdır. Bütün bunlar Azərbaycanda mikromaliyələşdirmə xidmətlərinə yüksək tələbi şərtləndirir və bunun gələcəkdə azalmağa doğru meyl etməyəcəyinə və artacağını söyləməyə əsas verir".
Azərbaycanda AMA-ya mikromaliyyələşdirmə ilə məşğul olan 30 təşkilat daxildir. Onların arasında səkkiz kommersiya bankı, 20 BOKT və iki lizinq şirkəti var.
AMB-nin məlumatına görə, ölkədə fəaliyyət göstərən bütün BOKT-ların aktivlərinin həcmi 2013-cü ilin yekunları üzrə 542,13 milyon manat təşkil edib. Bütün ölkədə 43 bank və 148 BOKT fəaliyyət göstərir ki, onlardan 111-i kredit ittifaqıdır.