Azərbaycan, Bakı, 10 mart /Trend, müxbir E.Əliyev/
Xorvatiyanın Dövlət Əmlakının İdarə Edilməsi üzrə Dövlət Agentliyi və Turizm Nazirliyi tərəfindən Kupari I sahəsi ilə bağlı tikinti və əmlakın istifadəsi hüququnun əldə edilməsinə dair xarici sərmayədarlar tərəfindən maraq ifadələrinin təqdimatı üçün dəvət elan edilib. Bu barədə Trend bazar ertəsi Azərbaycanda İxracın və İnvestisiyaların Təşviqi Fondunun (AZPROMO) saytına istinadən məlumat verir.
Dubrovnik şəhərində yerləşən Kupari turizm kompleksi keçmiş hərbi istirahət mərkəzidir.
Hazırda bu kompleksin bir hissəsi (Kupari I) dəniz sahilində yerləşən 1626 yer tutumlu 5 otelden ibarətdir. Tenderdə iştirak haqqı 15 min Xorvatiya kunu (təqribən 2719 dollar) təşkil edir.
Layihə Xorvatiya hökuməti tərəfindən strateji əhəmiyyətli qiymətləndirilir. Bu o deməkdir ki, kurorta yatırılacaq investisiyaların ümumi həcmi 20 milyon avrodan az olmamalıdır. Əgər maliyyələşdirmə Avropa İttifaqının fondları ilə birgə həyata keçirilsə, bu məbləğ 10 milyon avro olmalıdır.
Maraq ifadəsinə dair məktub Xorvatiyanın Dövlət Əmlakının İdarə Edilməsi üzrə Dövlət Agentliyinə 30 gün müddətində təqdim edilməlidir.
Dövlət Statistika Komitəsinin məlumatına görə, iki ölkə arasında əmtəə dövriyyəsi ötən il 222,54 milyon dollar təşkil edib.