Azərbaycan, Bakı, 27 mart /Trend, müxbir A.Axundov/
İlin əvvəlindən Bakıda mənzillərin kirayə qiyməti 9,6 faiz bahalaşıb. Bunu Trend-ə "MBA Group" konsaltinq şirkətinin baş direktoru Nüsrət İbrahimov deyib.
Onun sözlərinə görə, Bakıda 1 otağın orta hesabla kirayə qiyməti ay ərzində 4,82 faiz artaraq fevralda 814 dollar təşkil edib.
N.İbrahimov hesab edir ki, ötən il Bakıda mənzillərin kirayə qiymətinin bahalaşma tempi (5 faiz) mənzilin satış qiymətinin artım sürətindən (26 faiz) xeyli aşağı olub: "Buna görə də kirayənin bahalaşma dinamikası satış bazarındakı tempi ötməyə çalışacaq".
O, qeyd edib ki, hazırda mənzil kirayəsi bazarında durğunluq müşahidə olunur, çünki ilin ilk ayları bu bazar üçün mövsümi deyil.
Bakıda "Sovetski" kimi tanınan ərazidə yaşayış obyektlərinin sökülməsi üzrə işlərin mənzillərin kirayə qiymətinə mümkün təsirinə gəlincə, N.İbrahimov bildirib ki, bu, hələlik kirayə qiymətinə təsir edən amil deyil.
