Azərbaycan, Bakı, 28 mart /Trend, müxbir E.Əliyev/
Dünya Bankının (DB) məhkəmə-hüquq sistemində yeni layihəsinin maliyyələşdirilməsi üzrə Azərbaycan hökuməti və DB arasında danışıqlar apreldə başlayacaq. Bunu Trend-ə bankın Bakı nümayəndəliyindən bildiriblər.
Nümayəndəlikdən qeyd ediblər ki, "Məhkəmə xidmətləri və ağıllı texnologiyalar" ("Judicial Services and Smart Technologies Project" - JSSTP) layihəsinin maliyyələşdirilməsi üzrə danışıqların başlaması aprelədək təxirə salınır: "Buna səbəb hökumətdə bütün zəruri parametrlərin müzakirəsi və dəqiqləşdirilməsinin davam etməsidir".
Daha əvvəl kredit sazişi üzrə ölkə hökuməti və DB arasında rəsmi danışıqların bu il martın ortaları və ya sonlarında başlayacağı gözlənilirdi.
Məsələnin bankın Direktorlar Şurasına çıxarılmasına gəlincə, DB-nin Bakı ofisindən qeyd ediblər ki, bu, cari maliyyə ilinin sonunadək baş verəcək: "İstənilən halda söhbət cari təqvim ilindən gedir".