Azərbaycan, Bakı, 29 mart /Trend, müxbir E.Əliyev/
Azərbaycanın "Rəvan Sığorta" şirkətinin aktivləri 2013-cü ilin yekunları üzrə 61,86 faiz artaraq ilin əvvəlindəki 11,38 milyon manata nisbətdə 18,42 milyon manat təşkil edib. Trend-in məlumatına görə, bu barədə şirkətin rəsmi mətbuatda dərc olunmuş balans hesabatında deyilir.
Sığorta şirkətinin maliyyə hesabatlılığının auditini müstəqil auditor Adıgözəl Musayev aparıb.
2013-cü ilin sonunda şirkətin uzunmüddətli aktivləri 1,13 milyon manat, qısamüddətli aktivləri isə 17,3 milyon manat təşkil edib.
Ötən il pul vəsaitlərində və onların ekvivalentlərində 15,26 milyon manat yığılıb. Bu həcmdən 10,35 milyon manat hesablaşma hesabında, 4,57 milyon manat isə depozit hesablarında yığılıb.
2013-cü ilin yekunları üzrə "Rəvan Sığorta"nın ödənilmiş nizamnamə kapitalı 8,9 milyon manat olub ki, bu da 2012-ci ilin göstəricisini (4 milyon manat) təqribən 2,3 dəfə üstələyir.
Ötən ilin sonunda şirkətin məcmu kapitalı 2012-ci illə müqayisədə 92,5 faiz artaraq 12,1 milyon manat təşkil edib.
Şirkətin məcmu öhdəlikləri ilin əvvəlindəki 11,38 milyon manata nisbətdə 61,86 faiz artaraq 6,33 milyon manat, ümumilikdə kapital və öhdəlikləri isə 18,42 milyon manat təşkil edib.
Ötən ilin yekunları üzrə şirkətin gəlirləri 4,25 milyon manat, xərcləri isə 3,23 milyon manat olub. Şirkət 2013-cü ili 822,24 min manatlıq xalis mənfəətlə başa vurub.
