Azərbaycan, Bakı, 6 may /Trend, müxbir E.İsmayılov/
"Bakı-Tbilisi-Qars" yeni dəmiryol xəttinin yaradılması layihəsinin başlamasından indiyədək Azərbaycan Respublikası Dövlət Neft Fondu (ARDNF) tərəfindən bu layihəyə 470,6 milyon dollar (2014-cü il aprelin 1-nə olan məlumata görə) vəsait ayrılıb. Trend-in məlumatına görə, bu barədə ARDNF-nin rəsmi saytında yerləşdirilmiş məlumatda deyilir.
Azərbaycan və Gürcüstan hökumətləri arasında imzalanmış sazişə uyğun olaraq, vəsait Azərbaycan Beynəlxalq Bankı (ABB) vasitəsilə "Marabda-Türkiyə sərhədi" dəmir yolunun və müvafiq infrastruktur obyektlərinin layihələndirilməsi, tikintisi, bərpası, yenidən qurulması və istismarı üçün yaradılan "Marabda-Kartsaxi Dəmir Yolu" MMC-yə köçürülüb.
Məlumatda bildirilir ki, 2014-cü ilin birinci rübündə Dövlət Neft Fondu layihənin reallaşdırılmasına 6,5 milyon dollar vəsait ayrılıb.
"Bakı-Tbilisi-Qars" dəmir yolu layihəsi Azərbaycan-Türkiyə-Gürcüstan dövlətlərarası sazişi əsasında həyata keçirilir.