Azərbaycan, Bakı, 26 may /Trend, müxbir E.Əliyev/
Gürcüstandan Azərbaycana polad armatur ixracı həm miqdar, həm də pul ifadəsində 2,2 dəfə artıb. Trend-in məlumatına görə, bu barədə Gürcüstan Milli Statistika Xidmətinin hesabatında deyilir.
Hesabatda bildirilir ki, 2014-cü ilin yanvar-aprel aylarında Gürcüstandan Azərbaycana dəyəri 21,45 milyon dollar olan 34,75 min ton polad armatur ixrac edilib ki, bu da ötən ilin analoji dövr göstəricisindən 2,16 dəfə və ya 18,3 faiz çoxdur. Müqayisə üçün: 2013-cü ilin yanvar-aprel aylarında Gürcüstandan Azərbaycana 9,93 milyon dollar məbləğində 15,85 min ton polad armatur ixrac edilib.
Gürcüstandan Azərbaycana ixracın strukturunda bu kateqoriyanın xüsusi çəkisi 11,38 faiz təşkil edib.
2014-cü ilin yanvar-aprel aylarında Gürcüstandan Azərbaycana 188,45 milyon dollar dəyərində mal ixrac olunub. Ötən ilin eyni dövrünə nisbətən Azərbaycana ixrac 9,83 faiz azalıb. Müqayisə üçün: 2013-cü ilin yanvar-aprel aylarında Azərbaycana 208,99 milyon dollar dəyərində Gürcüstan malları ixrac olunub.
