Azərbaycan, Bakı, 26 avqust /Trend, müxbir Zülfiyyə Qurbanova/
Bakının təkrar mənzil bazarında 1-5 otaqlı mənzillərin orta hesabla qiyməti il ərzində 22,6 faiz artaraq 1 kvadratmetrə görə 1627 manat (2075 dollar) təşkil edib. Müqayisə üçün: 2013-cü ilin iyulunda bazarda mənzillərin 1 kvadratmetrə görə qiyməti 1327 manat (1692 dollar) olub. Trend-in məlumatına görə, bu barədə "MBA Group" konsaltinq şirkətinin hesabatında deyilir.
Hesabata görə, 2014-cü ilin əvvəlindən təkrar mənzil bazarında mənzillərin 1 kvadratmetrinin qiyməti 10,7 faiz artıb. Müqayisə üçün: bu ilin yanvarında Bakıda mənzillərin 1 kvadratmetrinin qiyməti 1470 manat (1874 dollar) təşkil edib.
İyulda təkrar mənzil bazarında mənzillərin 1 kvadratmetrə görə 2735 dollar olmaqla ən yüksək qiyməti paytaxtın Səbail rayonunda qeydə alınıb. Bakının Nəsimi rayonunda mənzillərin 1 kvadratmetrə görə qiyməti 2334 dollar, Nərimanov rayonunda 2156 dollar, Yasamal rayonunda 2087 dollar, Binəqədi rayonunda 2037 dollar, Nizami rayonunda isə 1899 dollar olub.
Hesabata görə, iyulda Bakıda təkrar mənzil bazarında satış portfelinin böyük hissəsini ucuz evlər təşkil edib ki, onların da payı 54,47 faiz təşkil edib. Bahalı mənzillər ümumi satışın həcminin 45,53 faizini təşkil edib.
Təkrar bazarda alqı-satqı sövdələşmələrinin sayının azalması daşınmaz əmlakın ekspozisiya müddətinin 0,42 faiz artmasına gətirib çıxarıb. Hesabat dövründə bu müddət 84 gün təşkil edib.
Göstərilən dövrdə təkrar mənzil bazarında təkliflərin həcmi 2152 təşkil edib ki, bu da ötən ilin analoji dövrünün göstəricisindən 7,35 faiz çoxdur.
Hesabata görə, təkrar mənzil bazarında satışa çıxarılan mənzillərin 23 faizi Bakının Yasamal rayonunun, 22,3 faizi Nəsimi, 14,3 faizi Nərimanov, 10,3 faizi Binəqədi, 8,3 faizi isı Xətai rayonunun payına düşüb.
Təkrar mənzil bazarında satış portfelinin böyük hissəsini, yəni 35,9 faizi üçotaqlı, 32,6 faizini ikiotaqlı, 19,4 faizini birotaqlı, 10,4 faizini dördotaqlı, 1,7 faizini isı beşotaqlı mənzillər təşkil edib.
"MBA Group" şirkətinin ekspertləri hesab edirlər ki, əvvəlki aylarla müqayisədə bu ilin iyulunda təkrar mənzil bazarında qiymətlərin azalması qiymətlərin ən son həddə çatması ilə əlaqədardır.
