Azərbaycan, Bakı, 15 oktyabr /Trend, müxbir Maksim Tsurkov/
2015-ci ilin əvvəlinədək Bakının daşınmaz əmlak bazarında qiymətlərin azalması mümkündür. Bu barədə Trend-ə "MBA Group" konsaltinq şirkəinin rəhbəri Nüsrət İbrahimov bildirib.
N.İbrahimov son bir neçə ayda daşınmaz əmlak bazarında qiymətlərin sabitləşdiyini qeyd edib: "Biz ilin əvvəlindən təkrar mənzil bazarında qiymətlərin 15,5-16 faiz artımını müşahidə etdik. İlkin bazarda artım təxminən 13,1 faiz təşkil edir. Lakin son 3 ayda qiymətlər sabitləşib. Əgər biz bir ay 1-1,5 faiz artım müşahidə edirdiksə, növbəti ay eyni azalma baş verirdi. Yəni bu vəziyyət daşınmaz əmlak bazarında qiymətlərin sabitləşdiyindən xəbər verir".
Onun sözlərinə görə, eyni zamanda, bazarda aktivlik əhəmiyyətli dərəcədə azalıb: "Bu il bizə kommersiya obyektləri bazarı praktiki olaraq işləməyib. Aktivlik çox aşağıdır, torpaq bazarında isə yalnız bir sotu 5-6 minədək olan ucuz torpaq sahələrinə aiddir. Bahalı sahələrdə sövdələşmələrin həcmi əhəmiyyətli dərəcədə azalıb. Bu onunla əlaqədardır ki, bizdə daşınmaz əmlak bazarı dolayısilə neft-qaz sektoru ilə bağlıdır".
Ekspert izah edib ki, son aylar neftin qiymətləri azalır [iyundan oktyabra qədər olan dövrdə 20 faizə yaxın], müvafiq olaraq, büdcə xərcləri azalır, adamlar isə öz xərclərini azaltmağa çalışırlar: "Beləliklə, bazarda pul kütləsi də azalır. Əgər bu tendensiya bundan sonra da davam etsə, cari ilin sonu - gələn ilin əvvəlində daşınmaz əmlak bazarında qiymətlərin ucuzlaşması müşahidə olunacaq".
O, həmçinin qeyd edib ki, hazırda sərmayəçilər daşınmaz əmlak sahəsində fəallıq göstərməyə tələsmirlər: "Yayın əvvəlində daşınmaz əmlak sektorunda investisiyalaşdırmaya böyük maraq müşahidə etdik. Lakin bu gün sərmayəçilər hadisələrin gələcək inkişafını müşahidə edərək gözləmə mövqeyi tuturlar. Bunun cari ilin sonuna kimi davam edəcəyini güman edirəm".